BAKI,VOA Orxan Qədirzadə
Türkiyə Prezidenti Rəcəb Tayyib Ərdoğan iqlim böhranının təsirlərinin müharibələr və qlobal epidemiyalar qədər ciddi təhlükə yaratdığını bildirib. O, Sıfır Tullantı Forumu çərçivəsində çıxış edərək iqlim dəyişikliyinin artıq təkcə ekoloji məsələ deyil, bütün bəşəriyyəti əhatə edən qlobal böhran olduğunu vurğulayıb.
Ərdoğan çıxışında qeyd edib ki, iqlim böhranının təsirlərini minimuma endirmək üçün müxtəlif istiqamətlərdə tədbirlər görülür. O, bu sahədə aparılan işlərin davam etdiriləcəyini bildirib və gələcək beynəlxalq tədbirlərdə bu mövzunun əsas gündəm olacağını deyib.
Türkiyə lideri bildirib ki, Sıfır Tullantı Forumunun ideyaları əməli addımlarla birləşdirərək mühüm nəticələr ortaya qoyacağına inanır. O, həmçinin qeyd edib ki, noyabr ayında Antalyada keçiriləcək İqlim Dəyişikliyi üzrə Tərəflər Konfransının 31-ci sessiyasında (COP31) bu forumun üzərinə düşən missiya xüsusi əhəmiyyət daşıyır.
Ərdoğan çıxışında iqlim probleminin yalnız ekoloji dəyişiklik olmadığını, onun qida təhlükəsizliyi, enerji, nəqliyyat, səhiyyə və kənd təsərrüfatı kimi bir çox sahəyə təsir etdiyini bildirib. Onun sözlərinə görə, sənaye inqilabından sonra yaranan çirklənmə, qida ehtiyatlarının azalması, tullantıların idarə olunması və təbii fəlakətlər bir-birini gücləndirən qlobal zəncirə çevrilib.
O, iqlim məsələsinin “dəyişiklik” deyil, artıq “böhran” kimi qiymətləndirilməsinin daha real yanaşma olduğunu qeyd edib. Ərdoğan vurğulayıb ki, dünyanın müxtəlif bölgələrində iqtisadi rifah içində yaşayan ölkələrlə yanaşı, aclıq, yoxsulluq və xəstəliklərlə mübarizə aparan milyonlarla insan mövcuddur.
Çıxışda iqlim böhranına ən çox səbəb olan ölkələrin eyni zamanda bu böhrandan ən az zərər görən ölkələr olduğu da diqqətə çatdırılıb. O, bu qlobal ədalətsizliyin daha da dərinləşdiyini bildirib.
Türkiyə Prezidenti Birləşmiş Millətlər Təşkilatının Dünya Qida Proqramına istinad edilən göstəriciləri də xatırladıb. Bildirilib ki, dünyanın müxtəlif bölgələrində 43 milyon uşaq aclıq problemi ilə üz-üzədir. Həmçinin hər il istehsal olunan qidanın təxminən üçdə biri, yəni 1,3 milyard ton ərzaq israf olunur. İl ərzində təxminən 3 milyon uşağın isə aclıqla bağlı xəstəliklər səbəbindən həyatını itirdiyi qeyd olunub.
Ərdoğan əlavə edib ki, atıq problemi də qlobal miqyasda ciddi təhlükəyə çevrilib. Onun sözlərinə görə, Sakit Okeanın cənubunda təxminən 1,6 milyon kvadratkilometr ərazini əhatə edən və plastik tullantılardan ibarət nəhəng “çöp qitəsi” bunun ən narahatedici nümunələrindən biridir.
O, həmçinin texnologiyanın sürətli inkişafı və istehlak mədəniyyətinin dəyişməsi fonunda təbii resursların daha çox təzyiq altında qaldığını bildirib. Ərdoğanın sözlərinə görə, mövcud göstəricilər bu problemlərin azalmaq əvəzinə daha da dərinləşəcəyini göstərir.
Çıxışın sonunda Türkiyə Prezidenti qlobal ictimaiyyəti iqlim böhranına qarşı daha ciddi və koordinasiyalı mübarizəyə çağırıb.