BAKI,VOA, Fərid Mikayılov

Türkiyənin xarici işlər naziri Hakan Fidan Banqladeşlə əməkdaşlığın bütün istiqamətlər üzrə inkişaf etdirilməsində qətiyyətli olduqlarını bildirib.

VOA xəbər verir ki, o, Banqladeşə səfərinin yekunları ilə bağlı sosial media hesabında paylaşım edib.

Fidan qeyd edib ki, fevral ayında keçirilən seçkilərdən sonra yeni mərhələyə qədəm qoyan Banqladeşin böyük potensialının və ölkədə sabitlik, rifah və inkişaf naminə aparılan işlərin şahidi olublar.

Türkiyəli nazir bildirib ki, Banqladeşin xarici işlər naziri Xəlilur Rəhman ilə keçirdiyi görüşdə ikitərəfli münasibətlərin bütün sahələrdə inkişaf etdirilməsi ilə bağlı ortaq iradə bir daha təsdiqlənib.

“Ölkələrimiz arasındakı münasibətlər qardaşlıq əlaqələrimizə uyğun olaraq son dərəcə möhkəm təməl üzərində qurulub. Qarşıdakı dövrdə əməkdaşlığımızı bütün sahələrdə inkişaf etdirməkdə qərarlıyıq və banqladeşli qardaşlarımıza dəstəyimizi davam etdirəcəyik”, - deyə Fidan vurğulayıb.

Səfər çərçivəsində Türkiyə nümayəndə heyəti Banqladeşin Baş naziri Tarique Rahman tərəfindən qəbul olunub. Həmçinin nümayəndə heyəti Rohinca qaçqınlarının məskunlaşdığı Koks Bazar düşərgələrini ziyarət edib.

Fidan qeyd edib ki, Banqladeş bir milyondan çox Rohinca müsəlmanına ev sahibliyi etməklə mühüm humanitar missiya həyata keçirir. Onun sözlərinə görə, tərəflərin ortaq məqsədi Rohinca böhranına ədalətli və davamlı həll tapmaqdır.