BAKI,VOA Orxan Qədirzadə

Türkiyə Statistika Qurumu tərəfindən açıqlanan məlumatlara görə, 2026-cı ilin may ayında istehlak qiymətləri indeksi əvvəlki ayla müqayisədə 1,71 faiz artıb. İllik müqayisədə isə inflyasiya səviyyəsi 32,61 faiz təşkil edib.

Rəsmi statistikaya əsasən, qiymətlər ötən ilin dekabr ayı ilə müqayisədə 16,61 faiz yüksəlib. Son on iki aylıq orta göstərici üzrə inflyasiya isə 32,24 faiz olaraq qeydə alınıb.

Açıqlanan inflyasiya göstəriciləri dövlət qulluqçularının əməkhaqlarına, pensiyalara, minimum əməkhaqqına ediləcək mümkün artımlara, eləcə də kirayə bazarına təsir göstərə biləcək əsas iqtisadi göstəricilərdən biri hesab olunur.

May ayında ən yüksək paya malik əsas xərc qrupları üzrə fərqli tendensiyalar müşahidə edilib. Ərzaq məhsulları və alkoqolsuz içkilər kateqoriyasında qiymətlər aylıq müqayisədə 0,48 faiz azalıb. Nəqliyyat sektorunda qiymətlər 2,03 faiz, mənzil, su təchizatı, elektrik enerjisi, qaz və digər yanacaq növləri üzrə xərclər isə 2,28 faiz artıb.

Əsas xərc qruplarının ümumi inflyasiyaya təsirinə baxdıqda, ərzaq və alkoqolsuz içkilər qrupunun göstəriciyə mənfi 0,12 faiz bəndi təsir etdiyi müəyyənləşib. Nəqliyyat sektoru ümumi inflyasiyaya 0,35 faiz bəndi, mənzil və kommunal xidmətlər qrupu isə 0,27 faiz bəndi töhfə verib.

İstehlak səbətində yer alan 174 alt kateqoriyanın nəticələri də açıqlanıb. Məlumata görə, may ayında 28 alt kateqoriyada qiymət azalması qeydə alınıb. Doqquz alt kateqoriyada qiymətlər dəyişməz qalıb. Qalan 137 alt kateqoriyada isə qiymət artımı müşahidə olunub.

İqtisadçılar hesab edirlər ki, inflyasiya göstəriciləri Türkiyənin pul-kredit siyasəti, əməkhaqqı artımları və sosial ödənişlərlə bağlı gələcək qərarlarında mühüm rol oynayacaq.