BAKI,VOA Orxan Qədirzadə

Tanınmış YouTuber Ruhi Çenet hantavirus aşkarlanmış “MV Hondius” adlı kruiz gəmisində 24 gün davam edən səyahət etdiyini açıqlayıb. O, gəmidən ayrıldıqdan sonra yaşadıqlarını sosial şəbəkə hesabında paylaşıb.

VOA xəbər verir ki, 23 ölkədən 150-dən çox sərnişinin olduğu gəmi Atlantik okeanında Argentina istiqamətindən Afrikanın Qərbində yerləşən Cabo Verdeyə hərəkət edərkən yoluxucu xəstəlik şübhəsi yaranıb. Hadisə zamanı 3 nəfərin həyatını itirdiyi bildirilir.

İlkin məlumatlara əsasən, gəmidə bir neçə sərnişində xəstəlik əlamətləri qeydə alınıb və ən azı bir ölüm hadisəsinin hantavirusla əlaqəli olduğu ehtimal edilir. İspaniya tərəfinin hadisə ilə bağlı genişmiqyaslı araşdırma və dezinfeksiya prosesi aparacağı bildirilib.

Ruhi Çenet isə paylaşımında ilkin mərhələdə lazımi tibbi nəzarətin yetərli olmadığını və sərnişinlərin eyni məkanlarda toplaşmağa davam etdiyini qeyd edib.

Çenetin sözlərinə görə, gəmidə xidmət edən yeganə həkimin də yoluxduğu və vəziyyətinin ağır olduğu iddia edilir. Bu hal gəmidə tibbi müdaxilə imkanları ilə bağlı ciddi narahatlıq yaradıb.

Səfərdən sonra tibbi analizlərdən keçdiyini bildirən Ruhi Çenet ciddi yoluxma aşkar edilmədiyini deyib. O, “Ucuz xilas oldum, amma hələ də orada baş verənləri düşünürəm” ifadəsini işlədib.

Hantavirus nədir?

Hantavirus əsasən gəmiricilər vasitəsilə insanlara keçən virusdur. Yoluxma adətən siçan və siçovulların ifrazatının havaya qarışmış hissəciklərinin nəfəs yolu ilə qəbul edilməsi nəticəsində baş verir.

Əsas əlamətlər:

Yüksək hərarət

Əzələ və baş ağrısı

Güclü halsızlıq

Ağır hallarda böyrək çatışmazlığı

Bəzi növlərdə kəskin tənəffüs çatışmazlığı

Mütəxəssislərə görə, xəstəlik nadir görülsə də, ağır gedişat və yüksək ölüm riski daşıya bilər.

Gəmidə baş verən hadisə kruiz təhlükəsizliyi, yoluxucu xəstəliklərin idarə olunması və sərnişin nəzarət protokolları ilə bağlı sualları yenidən gündəmə gətirib.

Hadisə ilə bağlı araşdırma davam edir.