BAKI,VOA, Nailə Babazadə

Türkiyənin AFAD və Türk Qızılayı tərəfindən hazırlanan, daxilində 730 ton humanitar yardım olan gəmi Livanın paytaxtı Beyrutun limanına çatıb.

VOA xəbər verir ki, İsrailin hücumları nəticəsində ölkə daxilində bir milyondan çox insanın (əhalinin təxminən 20%-i) didərgin düşməsi fonunda göndərilən bu yardım paketinə 7 min 200 çadır, 10 mindən çox qida bağlaması, 28 min ədyal və minlərlə gigiyena dəsti daxildir. Yardımların Livan Yüksək Yardım Komitəsinə təhvil verilərək qısa müddətdə sığınacaq mərkəzlərində və ondan kənarda yaşayan ehtiyac sahibi ailələrə paylanması planlaşdırılır.

Beyrut limanında keçirilən qarşılanma mərasimində iştirak edən Türkiyənin səfiri Murad Lütəm Türkiyənin milli gəlirə nisbətdə dünyada ən çox humanitar yardım edən ölkə olduğunu və bu dəstəyin iki ölkə arasındakı qardaşlıq bağlarının göstəricisi olduğunu vurğulayıb. Livanın Sosial İşlər və İdari İnkişaf nazirləri isə öz çıxışlarında Türkiyənin həm humanitar, həm də siyasi səviyyədə ilk gündən etibarən yanlarında olduğunu qeyd edərək, xüsusilə sığınacaq ehtiyacının qarşılanmasında çadırların strateji əhəmiyyətini qeyd ediblər. Bu, son bir həftə ərzində Türkiyədən Livana çatan ikinci böyük yardım gəmisidir.