BAKI,VOA, Orxan Qədirzadə

Türkiyənin Xarici İşlər naziri Hakan Fidan Antalya Diplomatik Forumu çərçivəsində keçirilən Balkan Sülh Platformasının 3-cü iclasına sədrlik edib.

VOA xəbər verir ki, toplantı Antalyanın turistik bölgəsi Belekdə yerləşən NEST Konqres Mərkəzində baş tutan 5-ci Antalya Diplomatik Forumu çərçivəsində keçirilib.

Türkiyə Xarici İşlər Nazirliyinin məlumatına görə, iclas platformanın regionda sülh, dialoq və əməkdaşlığın gücləndirilməsi məqsədilə həyata keçirilən fəaliyyətlərinin davamı kimi təşkil olunub. Görüşdə Balkan ölkələri arasında siyasi koordinasiya, regional sabitlik və qarşılıqlı əməkdaşlıq məsələləri müzakirə edilib.

Qeyd edək ki, 17 aprel tarixində başlayan 5-ci Antalya Diplomatik Forumu dünya liderlərini, yüksək səviyyəli hökumət nümayəndələrini və beynəlxalq təşkilat rəhbərlərini bir araya gətirib. Forum Türkiyə Prezidenti Rəcəb Tayyib Ərdoğanın himayəsi altında və Türkiyə Xarici İşlər Nazirliyinin təşkilatçılığı ilə keçirilir. Tədbirin qlobal kommunikasiya tərəfdaşı Anadolu Agentliyidir.

Forumda 20-dən çox dövlət və hökumət başçısı, təxminən 15 vitse-prezident və baş nazir müavini, 50-dən çox nazir (onlardan 40-dan çoxu xarici işlər nazirləridir), 75 beynəlxalq təşkilat nümayəndəsi daxil olmaqla 460-dan çox yüksək səviyyəli qonaq iştirak edir. Ümumilikdə isə tədbirə akademik dairələr və tələbələrlə birlikdə 5 minə yaxın iştirakçı qatılıb.