BAKI,VOA Orxan Qədirzadə
Türkiyə Böyük Millət Məclisinin sədri Numan Kurtulmuş terror təşkilatının silahı yerə qoyması və ləğvi prosesinin başa çatmasından sonra ölkədə birlik və həmrəyliyin daha da möhkəmlənəcəyini bildirib.
Türkiyə Böyük Millət Məclisinin sədri Numan Kurtulmuş Şırnakda keçirilən tədbirdə çıxışı zamanı terrorla mübarizə, parlamentdə aparılan qanunvericilik işləri, NATO, Avropanın təhlükəsizliyi və ölkənin xarici siyasəti ilə bağlı mühüm açıqlamalar verib.
Kurtulmuş bildirib ki, terror təşkilatının silahı yerə qoyması və tamamilə ləğv olunmasından sonra Türkiyə Böyük Millət Məclisində qəbul ediləcək hüquqi tənzimləmələr sayəsində bu mərhələ arxada qalacaq və ölkədə birlik, bərabərlik və sabitlik daha da güclənəcək. O vurğulayıb ki, prosesin uğurla başa çatması üçün bütün tərəflər təxribatlardan çəkinməli və istifadə olunan ifadələrə diqqət yetirməlidirlər.
Onun sözlərinə görə, parlament komissiyası məsələ ilə bağlı hesabatını tamamlayıb və təşkilatın tərksilahı təsdiqləndikdən sonra müvəqqəti hüquqi çərçivə hazırlanacaq. Kurtulmuş qeyd edib ki, planlaşdırılan hüquqi tənzimləmə ümumi amnistiya xarakteri daşımayacaq və yalnız silahı könüllü təhvil verən şəxslərə şamil ediləcək.
Numan Kurtulmuş son iki ildə Türkiyədə terror hadisələrinin əhəmiyyətli dərəcədə azaldığını bildirərək, TUSAŞ-a qarşı hücum istisna olmaqla ölkənin heç bir bölgəsində terror aktının baş vermədiyini deyib. O əlavə edib ki, regionda terrorun aradan qaldırılması Türkiyənin təhlükəsizliyinə də müsbət təsir göstərir.
Parlament sədri NATO-nun yeni təhlükəsizlik reallıqlarına uyğun konsepsiyaya ehtiyac duyduğunu da vurğulayıb. Onun fikrincə, Avropa son illərdə ciddi təhlükəsizlik boşluğu ilə üzləşib və ABŞ administrasiyasının dəyişən siyasəti bu prosesi daha da sürətləndirib. Kurtulmuş hesab edir ki, NATO yalnız müharibələrin qarşısını almağa deyil, həm də sülhün qurulmasına xidmət edən yeni yanaşmalar formalaşdırmalıdır.
O, Türkiyənin müdafiə sənayesində əldə etdiyi nailiyyətlərə də toxunaraq bildirib ki, ölkə yeni nəsil müdafiə texnologiyalarının istehsalı sahəsində dünyanın aparıcı dövlətləri ilə rəqabət aparan mühüm aktora çevrilib. Kurtulmuşun sözlərinə görə, Avropa ölkələri də Türkiyəni etibarlı və sabit tərəfdaş kimi qiymətləndirirlər.
Çıxışında daxili siyasi proseslərə də münasibət bildirən Kurtulmuş, Türkiyənin əsas müxalifət partiyası olan Cümhuriyyət Xalq Partiyasında yaşanan daxili gərginliyin tezliklə aradan qalxacağına ümid etdiyini bildirib. O qeyd edib ki, parlament rəhbərliyi bütün siyasi partiyalara bərabər məsafədə dayanır və fəaliyyətini yalnız qanunvericiliyin tələbləri çərçivəsində həyata keçirir.