BAKI,VOA, Nailə Babazadə

Türkiyə Böyük Millət Məclisinin (TBMM) sədri Numan Kurtulmuş İstanbulda keçirilən “Parlamentlərarası İttifaqın (İPU) 152-ci Baş Assambleyasının Açılış Mərasimi”ndə çıxış edib.

VOA xəbər verir ki, çıxışı zamanı İsrailin beynəlxalq hüququ pozan hərəkətlərinə toxunan Kurtulmuş, bu ölkənin Birləşmiş Millətlər Təşkilatındakı (BMT) üzvlüyünün dondurulması üçün çağırış edib. O, vaxtilə Cənubi Afrikadakı aparteid rejiminə qarşı tətbiq edilən sanksiyaları xatırladaraq, bu gün eyni addımın İsrailə qarşı atılmasının vacibliyini vurğulayıb.

TBMM sədri həmçinin BMT-nin mövcud strukturunu və effektivliyini kəskin tənqid edib. Numan Kurtulmuş təşkilatın son dövrlərdə heç bir münaqişəni və ya müharibəni dayandıra bilmədiyini qeyd edərək, BMT-nin artıq güclü dövlətlərin maraqlarına xidmət edən və onlar tərəfindən yönləndirilən bir quruma çevrildiyini bildirib. O, qlobal sülhün təmin olunması üçün beynəlxalq təşkilatların ədalətli prinsiplər əsasında yenidən qurulmasının zəruriliyini diqqətə çatdırıb.