BAKI,VOA, Fərid Mikayılov

Türkiyə Prezidenti Rəcəb Tayyib Ərdoğan hakim partiyanın qrup iclasında mühüm siyasi açıqlamalarla çıxış edib.

VOA xəbər verir ki, Ərdoğan çıxışı zamanı əsas müxalifət partiyasını sərt tənqid edərək bildirib ki, ölkədə “dövlət çevrilişi və xunta ənənəsinin əsas daşıyıcısı” kimi həmin siyasi qüvvə tarixdə iz qoyub.

Prezident vurğulayıb ki, dövlət başçısına və hakimiyyətə qarşı təhqiramiz ifadələrin işlədilməsi qəbuledilməzdir və bu cür davranışlar siyasi etikaya ziddir.

Ərdoğan həmçinin müxalifət liderinin ritorikasını tənqid edərək, son dövrlərdə istifadə olunan ifadələrin cəmiyyətdə narahatlıq yaratdığını qeyd edib. Onun sözlərinə görə, bu yanaşma siyasi dialoqa deyil, qarşıdurmaya xidmət edir.

Türkiyə lideri bildirib ki, ölkənin mürəkkəb regional şəraitdə olduğu bir dövrdə siyasi mühitdə nifrət və qarşıdurma dilinin güclənməsinə imkan verilməyəcək.

Ərdoğan əlavə edib ki, hakimiyyət Ramazan ayı ərzində müxalifətin ittihamlarına cavab verməməyə çalışıb və bunu siyasi mədəniyyət çərçivəsində dəyərləndirib.