BAKI, VOA, Nailə Babazadə

Zeki Aktürk Yunanıstanın beynəlxalq müqavilələrə zidd olaraq adaların qeyri-hərbi statusunu pozan addımlarına toxunaraq bildirib ki, bu cür cəhdlər həm hüquqi müstəvidə qanunsuzluq yaradır, həm də qonşuluq və müttəfiqlik münasibətlərinə xələl gətirir. Ankara tərəfincə bu hərəkətlərin regional sabitliyə təhdid olduğu və beynəlxalq hüquq normaları çərçivəsində qəbulolunmazlığı bir daha vurğulanıb.

VOA xəbər verir ki, bu barədə Türkiyə Milli Müdafiə Nazirliyinin (MSB) mətbuat və ictimaiyyətlə əlaqələr üzrə müşaviri, kontr-admiral Zəki Aktürk nazirlikdə keçirdilən həftəlik brifinqdə məlumat verib.

Türkiyə Silahlı Qüvvələrinin terrorla mübarizə əməliyyatlarına dair son statistikaları paylaşan Aktürk həftə ərzində daha 4 PKK terrorçusunun təslim olduğunu qeyd edib. O, sərhəd xəttində və ondan kənarda daimi təhlükəsizliyin təmin edilməsi məqsədilə mina, əldəqayırma partlayıcı maddə, mağara və sığınacaqların məhv edilməsi işlərinin fasiləsiz davam etdiyini bildirib. Xüsusilə Münbiç bölgəsində aşkar edilən tunel şəbəkələrinin 95 faizinin uğurla sıradan çıxarıldığını deyən sözçü, son bir həftədə 3 kilometr, Suriya əməliyyat zonalarında isə ümumilikdə 764 kilometr uzunluğunda tunelin məhv edildiyini diqqətə çatdırıb.

Sərhəd təhlükəsizliyi məsələsinə də toxunan kontr-admiral Aktürk qeyd edib ki, Türkiyənin dövlət sərhədləri çətin iqlim və relyef şəraitində beynəlxalq standartlara uyğun şəkildə qorunur. Son bir həftə ərzində qanunsuz yollarla sərhədi keçməyə cəhd göstərən 78 nəfər yaxalanıb ki, onlardan 7-si terror təşkilatı üzvüdür. Bundan əlavə, 1733 nəfərin sərhədi keçməsinin qarşısı alınıb. Beləliklə, ilin əvvəlindən bəri sərhəddə yaxalananların sayı 1278-ə, keçidin qarşısı alınanların sayı isə 13 min 493 nəfərə çatıb. Türkiyə ordusu milli təhlükəsizliyə yönələn hər hansı bir təhdidi həm ölkə daxilində, həm də sərhədyanı bölgələrdə qətiyyətlə dəf etməkdə davam edir.