BAKI,AzerVoice, Fərid Mikayılov
Türkiyənin Enerji və Təbii Sərvətlər naziri Alparslan Bayraktar, İtaliyanın Milan şəhərində keçirilən Gastech 2025 tədbiri çərçivəsində milli enerji şirkəti BOTAŞ ilə beynəlxalq enerji ticarət şirkəti Hartree arasında yeni təbii qaz sazişinin imzalandığını açıqlayıb.
AzerVoice xəbər verir ki, müqavilə iki il müddətində ümumilikdə 600 milyon kubmetr maye təbii qazın (LNG) tədarükünü nəzərdə tutur.
“Bu əməkdaşlığın Türkiyənin çoxmənbəli, çevik və təhlükəsiz enerji strukturuna mühüm töhfə verəcəyinə inanırıq”- deyə Bayraktar imzalanan əməkdaşlığın əhəmiyyətini vurğulayıb.
Mütəxəssislərin fikrincə, sözügedən razılaşma Türkiyənin enerji bazarında mənbə müxtəlifliyini artırmaq, təchizat təhlükəsizliyini gücləndirmək və xüsusilə qış aylarında artan tələbatı qarşılamaq baxımından strateji əhəmiyyət daşıyır.