BAKI, AzerVoice, Fərid Mikayılov

Türkiyə Prezidentinin köməkçisi Cevdet Yılmaz, 2026–2028-ci illəri əhatə edən Orta Müddətli Proqramı (OMP) təqdim edərək, ölkə iqtisadiyyatının beynəlxalq çətinliklərə baxmayaraq sabit böyüməsini davam etdirdiyini bildirib.

AzerVoice xəbər verir ki, Yılmaz çıxışında qeyd edib ki, hökumətin əsas hədəfi inflyasiya ilə mübarizədir və 2024-cü ilin iyunundan etibarən fasiləsiz dezinflasiya mərhələsinə başlanılıb.

"İyun 2024-dən bu yana davam edən dezinflasiya prosesi nəticəsində inflyasiya 42,5 faiz aşağı düşüb. Bu isə tətbiq etdiyimiz sərt pul və maliyyə siyasətlərinin uğurunu göstərir"- deyə o bildirib.

Onun sözlərinə görə, qlobal iqtisadiyyatda sərtləşən maliyyə şərtləri, zəif xarici tələbat və artan geosiyasi risklərə baxmayaraq, Türkiyə iqtisadiyyatı balanslı və dayanıqlı mövqeyini qoruyub.

İqtisadi göstəricilər

• 2024-cü ildə Türkiyə iqtisadiyyatı 3,3 faiz artıb.
• 2025-ci ilin ilk yarısında artım tempi 3,6 faiz təşkil edib.
• Son 15 ildə ölkə fasiləsiz iqtisadi artımı davam etdirib.

Yılmaz əlavə edib ki, əldə olunan böyümə inflyasiya təzyiqi yaratmadan baş verib və iqtisadiyyatın “həddindən artıq qızışmasına” imkan verilməyib.