BAKI,VOA,Yusif Şərifzadə

Yəməndə fəaliyyət göstərən husi hərəkatı 2019-cu ildən bəri ilk dəfə Səudiyyə Ərəbistanının şərqində yerləşən neft infrastrukturunu hədəf aldığını bildirib. Hücumun miqyası və mümkün ziyan barədə Səudiyyə Ərəbistanı rəsmiləri hələlik məlumat açıqlamayıblar.

VOA xəbər verir ki, husilərin hədəf aldığı bildirilən obyektlər arasında krallığın şərq neft yataqlarını Qırmızı dəniz sahilindəki Yənbu limanı ilə birləşdirən təxminən 1 200 kilometrlik Petroline neft kəməri də var. Məlumata görə, bu, husilərin həmin marşrutu 2019-cu ildən bəri ilk dəfə hədəfə aldıqlarını iddia etdikləri hücumdur.

Hörmüz boğazında yaranan təhlükəsizlik problemlərindən sonra Səudiyyə Ərəbistanının bu marşrutdan daha intensiv istifadə etdiyi bildirilir. Məlumata əsasən, əvvəllər gündə təxminən 1 milyon barel neft daşınan kəmər vasitəsilə hazırda 5 milyon barelədək xam neft nəql olunur.

Səudiyyə Ərəbistanı bundan əvvəl yaydığı bəyanatda hücumlara cavab vermək hüququnu özündə saxladığını açıqlayıb. Məlumatlarda ehtimal edilir ki, mümkün cavab tədbirləri Yəmənin Hudeydə limanı, Kəmaran adası, Qırmızı dəniz sahilində yerləşən digər ərazilər və Səna Beynəlxalq Hava Limanını əhatə edə bilər. Riyad həmin ərazilərin pilotsuz uçuş aparatları və raket hücumları üçün istifadə edildiyini iddia edir.

Husilər isə öz növbəsində Səudiyyə Ərəbistanının zərbələrinin əsasən Yəməndəki mülki infrastruktura ziyan vurduğunu, hərbi imkanlarına isə məhdud təsir göstərdiyini bildirirlər.

Tərəflərin qarşılıqlı iddiaları müstəqil mənbələr tərəfindən ayrıca təsdiqlənməyib.