BAKI,VOA,Yusif Şərifzadə

Səudiyyə Ərəbistanı Xarici İşlər Nazirliyi krallığa qarşı həyata keçirilən pilotsuz uçuş aparatı hücumlarını qətiyyətlə pisləyib və hücumun mənbəyinə qarşı cavab vermək, eləcə də məsul şəxslərin qarşısını almaq hüququnu özündə saxladığını bəyan edib.

VOA xəbər verir ki, nazirliyin yaydığı bəyanatda Səudiyyə Ərəbistanının "təcavüzün mənbəyinə" qarşı beynəlxalq hüquq çərçivəsində cavab vermək hüququna malik olduğu vurğulanıb.

Bu bəyanat Səudiyyə Ərəbistanı qüvvələrinin cümə günü Yəmənin husi hərəkatının nəzarətində olan Hudeydə şəhərinə endirdiyi zərbələrdən sonra səsləndirilib. Hadisə ABŞ və İran arasında regional gərginlik fonunda Yəməndə qarşıdurmanın növbəti mərhələsi kimi qiymətləndirilir.

Hudeydə limanı husilərin nəzarətində olan Yəmənin şimal bölgələri üçün əsas təchizat qapısı hesab olunur. Liman vasitəsilə həmin ərazilərə kommersiya yüklərinin və humanitar yardımın böyük hissəsi çatdırılır.

Yəməndə Səudiyyə Ərəbistanının rəhbərlik etdiyi koalisiyanın sözçüsü, general-mayor Türki əl-Maliki isə gərginliyə görə husiləri məsuliyyət daşımaqda ittiham edib. O, husilərin Qırmızı dənizdə gəmiçiliyə qarşı hücumlarını "qorxaq və məsuliyyətsiz" addımlar kimi qiymətləndirib.

Husilər isə bu ittihamlarla bağlı hələlik rəsmi açıqlama verməyiblər.