BAKI, AzerVoice, Səməd Əyyubov
Türkiyə Böyük Millət Məclisinin (TBMM) sədri Numan Kurtulmuşun imzasını daşıyan və İsrailin Qəzzadakı işğal siyasəti ilə Fələstin xalqına qarşı həyata keçirdiyi soyqırımı pisləyən bəyannamə TBMM Baş Assambleyasında qəbul edilib.
AzerVoice-un məlumatına görə, sənəddə bütün ölkə parlamentləri İsraillə hərbi və ticarət əlaqələrini dayandırmağa, Fələstinə qarşı tətbiq olunan embarqonu qırmaq üçün təcili addımlar atmağa çağırılıb.
Bəyannamədə vurğulanıb ki, İsrailin onilliklərdir davam etdirdiyi işğal və ilhaq siyasəti son iki ildə xüsusilə Qəzzada soyqırıma çevrilib. Qeyd olunub ki, aclıq və qıtlıq bir silah kimi istifadə olunaraq on minlərlə insanın həyatına son qoyulub. Baş nazir Benyamin Netanyahunun hökumətinin Qəzza əhalisini aclığa məhkum etməsi BMT və beynəlxalq təşkilatlar tərəfindən də təsdiqlənib.
Sənəddə İsrailin son iki ildə əksəriyyəti qadın və uşaq olmaqla 70 minə yaxın insanı öldürdüyü, 150 mindən çox insanı yaraladığı, bölgənin mülki infrastrukturunu dağıtdığı qeyd olunub. Qüds və İordan çayının qərb sahilində qanunsuz məskunlaşmaların və zorakılıqların sürətləndirildiyi, torpaq zəbtinin davam etdiyi vurğulanıb.
TBMM bəyannaməsində İsrailin həyata keçirdiyi zorakılıqların və qətliamların beynəlxalq cinayət xarakteri daşıdığı, xüsusilə aclıq və qıtlığın məhv silahı kimi istifadəsinin soyqırım cinayəti olduğu qeyd olunub. Beynəlxalq ictimaiyyət İsraili daimi atəşkəsə məcbur etməyə, silahlı qüvvələrini bölgədən çıxarmağa və humanitar yardımların fasiləsiz çatdırılmasına şərait yaratmağa dəvət olunub.
Eyni zamanda, 1967 sərhədləri əsasında müstəqil və suveren Fələstin dövlətinin yaradılmasının bölgədə ədalətli və daimi sülhün yeganə yolu olduğu bildirilib. Əqsa məscidinə və digər müqəddəs məkanlara hücumların dərhal dayandırılması tələb olunub. İsrail hökuməti soyqırım siyasətini dayandırmayana qədər onun BMT və beynəlxalq təşkilatlardakı üzvlüyünün dondurulması çağırışı edilib.
Bəyannamənin sonunda dünya parlamentləri İsraillə hərbi və ticari əlaqələri kəsməyə, Fələstinə tətbiq edilən embarqonu aradan qaldırmağa, soyqırım və müstəmləkəçilik siyasətinə qarşı çıxmağa, Fələstin xalqının qanuni haqlarını müdafiə etməyə və iki dövlətli həll yolunu dəstəkləməyə çağırılıb. Həmçinin, 18 aprel 2025-ci ildə İstanbulda TBMM təşəbbüsü ilə yaradılmış “Fələstini Dəstəkləyən Parlamentlər Qrupu”na qoşulmaq çağırışı da səsləndirilib.
Qəbul edilən sənədin “Rəsmi Qəzet”də dərc ediləcəyi bildirilib.