BAKI, Azervoice, Nərmin Ağayeva
Türkiyəli iş adamı Gökhan Erdem Blue Origin ilə kosmosa uçub.
Azervoice xəbər verir ki, Erdem Holdinqin İdarə Heyətinin üzvü, türkiyəli iş adamı Gökhan Erdem Blue Origin şirkətinin New Shepard NS-34 missiyası çərçivəsində kosmos səyahətinə qatılıb.
O, Blue Origin ilə kosmosa uçan ilk türk və bu missiyada iştirak edən ilk türk iş adamı olub.
Blue Origin-in rəsmi saytında və sosial media platformalarında canlı yayımlanan uçuşda Erdemə ABŞ, Puerto Riko, Böyük Britaniya və Hindistandan olan iştirakçılar qoşulub. Təxminən 11 dəqiqə davam edən səyahət zamanı ekipaj Karman xəttini keçərək mikroqravitasiya şəraitini təcrübədən keçirib.
Qeyd edək ki, NS-34 missiya nişanında hər bir sərnişinin mədəni irsini təmsil edən simvollara yer verilib. Gökhan Erdemi təmsil edən nişanda Boğaziçi silueti və “34” nömrəsi əks olunub.