BAKI, AzerVoice
Türkiyə Xarici İşlər Nazirliyi İsrailin Madleen gəmisinə müdaxiləsi ilə bağlı açıqlama yayıb. Nazirlik açıqlamasında bildirib ki, müdaxilə beynəlxalq hüququn açıq şəkildə pozulmasıdır.
AzerVoice xəbər verir ki, Nazirlik, İsrailin bir terror dövləti olduğunu bir daha sübut etdiyini bildirib. Açıqlamada, beynəlxalq ictimaiyyətin haqlı etirazlarının davam edəcəyi vurğulanıb.
Türkiyə XİN, İsrailin hücumları ilə beynəlxalq hüququ pozduğunu və gəminin müdaxilə zamanı beynəlxalq sularda olduğunu diqqətə çatdırıb. Nazirlik bildirib ki, bu müdaxilə dəniz təhlükəsizliyini də təhdid edir.
Nazirliyin açıqlamasında, “Madleen” gəmisində Türk vətəndaşlarının da olduğu qeyd olunaraq aşağıdakı ifadələr yer alıb:
“Qəzzaya humanitar yardım çatdırmaq məqsədilə yola çıxan və içərisində vətəndaşlarımızın da olduğu ‘Madleen’ adlı gəminin beynəlxalq sularda hərəkətdə olduğu vaxt İsrail qüvvələri tərəfindən müdaxiləyə məruz qalması, beynəlxalq hüququn açıq şəkildə pozulmasıdır.
Netanyahu hökumətinin dəniz təhlükəsizliyi və naviqasiya azadlığını təhdid edən bu alçaq hücumu, İsrailin bir daha terror dövləti olduğunu sübut etmişdir.
Aclığı silah kimi istifadə edən və humanitar yardımların çatdırılmasına mane olan İsrailin soyqırım siyasətinə qarşı beynəlxalq ictimaiyyətin haqlı etirazı davam edəcək. İsrailin təcavüzkar və hüquq tanımayan davranışı, insanlıq dəyərlərini müdafiə edən səsləri susdura bilməyəcək.”
Qeyd edək ki, İsrail ordusu bu gün səhər saatlarında, Tel-Əviv hökumətinin tətbiq etdiyi blokada səbəbindən aclıqla mübarizə aparan Qəzzaya humanitar yardım çatdırmaq və blokadanın beynəlxalq hüquqa zidd olduğunu göstərmək məqsədilə yola çıxan “Madleen” gəmisinə əməliyyat keçirib.
"Azadlıq Donanması Koalisiyası" adlı vətəndaş cəmiyyəti təşkilatının Qəzzaya tətbiq olunan blokadanı yararaq bölgəyə yardım çatdırmaq məqsədilə təşkil etdiyi son missiya çərçivəsində 18 metrlik “Madleen” yelkənli gəmisi, 1 iyun tarixində İtaliyanın Kataniya şəhərindəki San Covani Li Kuti Limanından Qəzza istiqamətində yola çıxmışdı.
Koalisiyanın "Telegram" hesabında gecə saatlarında yayımlanan açıqlamada bildirilir ki, İsrail ordusu “Madleen” gəmisinə müdaxilə edib: “Madleen ilə əlaqə kəsildi. İsrail ordusu gəmiyə daxil oldu. Gəmidəki könüllülər İsrail ordusu tərəfindən girov götürüldü.”
Gəmidə Avropa Parlamentinin fransız üzvü Rima Hassan və Almaniya vətəndaşı Yasemin Acarla yanaşı, Türkiyədən Hüseyn Şüayb Ordu, Braziliyadan Tiago Avila, İspaniyadan Serxio Toribio, Niderlanddan Marko van Rennes, Fransadan Baptist Andre, Reva Viard, Paskal Muriéras və Yanis Mhamdi, İsveçli iqlim fəalı Qreta Tunberq və jurnalist Omar Faiad daxil olmaqla ümumilikdə 12 nəfər olub.
İsrailin Xarici İşlər Nazirliyi bildirib ki, fəallar saxlanılaraq Aşdod limanına gətirilib. İsrailin Müdafiə Naziri Yisrael Katz isə saxlanılan şəxslərin Aşdoda dindiriləcəyini bəyan edib.