BAKI, AzerVoice

Türkiyə Prezidenti Rəcəb Tayyib Ərdoğan, Cənubi Qafqazda sülh və sabitlik çağırışı edərək, Azərbaycan və Ermənistan arasında aparılan sülh danışıqlarından məmnunluğunu ifadə edib.

AzerVoice xəbər verir ki, o, bu sözləri jurnalistlərin Zəngəzur dəhlizi və Laçın dəhlizinin açılması ehtimalı ilə bağlı sualına cavab olaraq deyib.

“Biz Cənubi Qafqazda toqquşmaları deyil, əmin-amanlıq və barış görmək istəyirik. Bölgədə əldə olunacaq davamlı sülh hər kəsə qazandıracaq. Azərbaycan-Ermənistan arasında sülh danışıqları bizi məmnun edir. Bu prosesi yaxından izləyirik və zəruri töhfələri veririk. Əldə ediləcək sülh həm Azərbaycan, həm Ermənistan, həm də ölkəmiz üçün dəyərlidir.”-deyə o bildirib.
Zəngəzur dəhlizi ilə bağlı danışan Türkiyə lideri, bu dəhlizin təkcə Naxçıvanla Azərbaycan arasında quru əlaqə olmadığını, həm də türk dünyasına uzanan strateji bir inteqrasiya xətti olduğunu vurğulayıb:
“Zəngəzur dəhlizi, Azərbaycan üçün yalnız Naxçıvanla quru əlaqə deyil, həm də Türkiyə üzərindən Türk dünyasına uzanan yeni inteqrasiya xəttidir. Bu keçidin qısa zamanda açılması, Qafqazda nəqliyyat və enerji infrastrukturunu da gücləndirəcək.”-deyə o əlavə edib.