BAKI,AzerVoice
Türkiyənin Xəzinə və Maliyyə naziri Mehmet Şimşek London səfəri çərçivəsində bir sıra yüksək səviyyəli ikitərəfli görüşlər keçirib.
AzerVoice xəbər verir ki, nazir, Birləşmiş Krallığın Xəzinə naziri Reyçel Rivs başda olmaqla, Azərbaycanın İqtisadiyyat naziri Mikayıl Cabbarov və Misirin Planlaşdırma, İqtisadi İnkişaf və Beynəlxalq Əməkdaşlıq naziri Rania əl-Məşatla bir araya gəlib.
Şimşek səfəri çərçivəsində, Avropa Yenidənqurma və İnkişaf Bankının (EBRD) təşkilatçılığı ilə keçirilən “Türkiyə İnvestisiya Perspektivi” panelində çıxış edərək Türkiyə iqtisadiyyatında son dövrlərdə baş verən dəyişikliklər və xarici investorlar üçün təqdim olunan fürsətlər barədə ətraflı məlumat verib. Panel geniş beynəlxalq iştirakla keçib.
Şimşek həmçinin, EBRD və Avropa İnvestisiya Bankının (EIB) yüksək səviyyəli nümayəndələri ilə də görüşlər keçirərək, iqtisadi əməkdaşlıq imkanlarını müzakirə edib. Görüşlərdə ticarət əlaqələrinin dərinləşdirilməsi, sektoral əməkdaşlıq və ikitərəfli iqtisadi münasibətlərin genişləndirilməsi əsas gündəm mövzuları olub.
Mehmet Şimşekin London proqramı bu gün də davam edir. O, Türkiyənin qurucu üzvü olduğu EBRD-nin Guvernatorlar Şurasının iclasında iştirak edəcək və burada sədr müavini kimi çıxış edəcək.
Toplantıda bankın 2026–2030-cu illəri əhatə edən Strategiya və Kapital Çərçivəsinin təsdiqlənəcəyi, habelə Səhraaltı Afrika regionunda yeni ölkələrin kredit istifadəçisi kimi bank sisteminə daxil edilməsinin müzakirə olunacağı gözlənilir.