Bakı, AzerVoice

Türkiyənin Təhsil Naziri Yusuf Tekin Türkiyədəki fransız məktəblərinin statusu ilə bağlı iki ölkə arasında yaranan böhranda Fransanın “təkəbbürünü” pisləyib.

AzerVoice xəbər verir ki, Tekin Fransa məktəblərinin statusu ilə bağlı Ankara ilə Paris arasında davam edən danışıqlar barədə "Problemin həlli üçün ikitərəfli razılaşmaya ehtiyac var, amma bunu belə istəmirlər. Qısacası təkəbbürlüdürlər. Ona görə də hələ ki, həll yolu tapılmayıb” deyə bildirib.

"Bu məktəblər diplomatik nümayəndəliklərdə çalışanların övladları üçün yaradılıb, lakin türkiyəli tələbələri də qəbul etməyə başlayıblar. Bu, qanuna ziddir" Tekin deyib.

Fransanın Ankaradakı səfirliyi cümə günü tələbələrin valideynlərinə göndərdiyi məktubda “2024-2025-ci tədris ilindən başlayaraq” türk tələbələrin çoxluq təşkil etdiyi İstanbul və Ankaradakı fransız məktəblərində qeydiyyatlarının rədd edilə biləcəyi barədə xəbərdarlıq edib.

Mübahisənin əsası ondan ibarətdir ki, Ankara Fransada rəsmi şəkildə tanınan türk məktəblərinin açılmasını tələb edir.

Nazirin sözlərinə görə, danışıqlar nəticə verməsə, bu məktəblər yeni türkiyəli tələbələri qəbul edə bilməyəcək, lakin köhnə tələbələr təhsillərini davam etdirə biləcəklər.

Uzunmüddətli perspektivdə qadağa türk tələbələrin çoxluq təşkil etdiyi bu məktəblərdə şagird sayının azalmasına səbəb olacaq.

Türkiyə mətbuatında Ankaranın Fransa məktəb müfredatına din dərslərinin əlavə edilməsini məcbur etməsi ilə bağlı xəbərləri dəyərləndirən Tekin, “Bu, açıq-aşkar bir yalan və etik olmayan yanlış məlumatdır” deyib.