BAKI,AzerVoice
Baykar şirkətinin milli və orijinal şəkildə inkişaf etdirdiyi Türkiyənin ilk pilotsuz döyüş təyyarəsi Bayraktar KIZILELMA, sınaq təqvimində nəzərdə tutulan Aerodinamik Sistem Tanımlama Testindən uğurla keçdi.
AzerVoice xəbər verir ki, Baykar-ın tamamilə öz vəsaitləri ilə inkişaf etdirdiyi və Türkiyənin ilk pilotsuz döyüş təyyarəsi olaraq xidmət edəcək Bayraktar KIZILELMA uçuş testlərini davam etdirir.
Tekirdağ-ın Çorlu bölgəsində yerləşən AKINCI Uçuş Təlim və Sınaq Mərkəzindən havaya qalxan Bayraktar KIZILELMA-nın TC-OZB3 quyruq nömrəli PT3 istehsal prototipi, test uçuşunda aerodinamik sistem tanımlama fəaliyyətlərini uğurla tamamladı.
Bayraktar KIZILELMA-nın inkişaf prosesi çərçivəsində ilkin prototiplərdən əldə edilən təcrübələr əsasında istehsal versiyasında mühüm dəyişikliklər aparıldı. Struktur gücləndirmələr ilə yanaşı, avionika sistemində təkmilləşdirmələr həyata keçirildi. Mühərrikinin uğurla inteqrasiyası başa çatdırılaraq uçuş reallaşdırıldı.
Güclü yeni mühərriki ilə səs sürətinə yaxınlaşacaq olan Bayraktar KIZILELMA, aerodinamik təkmilləşdirmələr sayəsində yüksək sürətlərdə daha yaxşı manevr qabiliyyətinə sahib olacaq. AESA radarı sayəsində əldə etdiyi yüksək situasiya fərqindəliyi ilə ən çətin tapşırıqları icra edə biləcək.
Qeyd edək ki, Bayraktar KIZILELMA layihəsi 2021-ci ildə başladı. 14 noyabr 2022-ci ildə istehsal xəttindən çıxan TC-ÖZB quyruq nömrəli Bayraktar KIZILELMA, Çorlu-da yerləşən AKINCI Uçuş Təlim və Sınaq Mərkəzinə gətirildi. Burada yer testlərini sürətlə və uğurla tamamladıqdan sonra 14 dekabr 2022-ci ildə ilk uçuşunu həyata keçirdi. Bayraktar KIZILELMA, cəmi bir il kimi rekord müddətdə havalanmağa başladı.
Bayraktar KIZILELMA, TEKNOFEST 2023 çərçivəsində dünya aviasiya tarixində ilk olan uçuşları reallaşdırdı. Bayraktar AKINCI PUA ilə formasiya uçuşları həyata keçirən Bayraktar KIZILELMA, 1 may 2023-cü ildə isə F-16 döyüş təyyarəsi SOLOTÜRK və F-5 jetləri ilə Türk Yıldızları eskadrilyası tərkibində İstanbul səmasında formasiya uçuşu icra etdi. Dünya aviasiya tarixi üçün dönüş nöqtəsi sayılan bu uçuş konseptləri, gələcəyin hava döyüş strategiyalarına da istiqamət verəcək.
İlk gündən bəri bütün layihələrini öz vəsaiti ilə həyata keçirən Baykar, 2003-cü ildən etibarən gəlirlərinin 83%-ni ixracatdan əldə edib. 2023-cü ildə 1.8 milyard dollarlıq ixracat həyata keçirən Baykar, Türkiyədə ən çox ixrac edən ilk 10 şirkət arasına daxil olub. Dünyanın ən böyük pilotsuz hava aparatı (PUA) ixracatçısı olan Baykar, 2024-cü ildə də qlobal uğurunu davam etdirərək gəlirinin 90%-ni ixracatdan əldə etdi və 1.8 milyard dollarlıq ixrac həyata keçirdi.
