BAKI,VOA
Türkiyə müxalifəti ABŞ-ın xüsusi elçisi Tom Baraka qarşı kəskin hücuma keçib. Buna səbəb Brakın Yaxın Şərqdə yalnız "güclü liderliyi olan rejimlərin" uğur qazandığını deməsi və Türkiyə ilə İsrail arasındakı alyansın bölgənin rifahı üçün yeganə yol olduğunu iddia etməsidir.
VOA xəbər verir ki, Tom Barak ötən şənbə günü Antalya Diplomatiya Forumunda çıxış edərək bildirib ki, "Yaxın Şərqdə yalnız güclü hakimiyyət hörmət qazanır". O, Suriyadakı rejimi "güclü, qətiyyətli və cəsur liderə" malik olduğu üçün uğurlu nümunə kimi göstərib.
"İnsanlar keçmişdə onunla razılaşmaya bilərdilər, amma indi onun düzgün istiqamətə rəhbərlik etdiyini görürlər."-deyə Barak bildirib.a
Barak həmçinin "Ərəb baharı"nın uğursuz olduğunu, demokratiya və insan haqları gözləntilərinin məyusluqla nəticələndiyini, bölgədə yalnız "müdrik monarxiyalar və ya konstitusiyalı monarxiyaların" uğur qazandığını vurğulayıb.
Müxalifətin qəzəbi: "Barak Türkiyəni təcili tərk etməlidir"
Ana müxalifət lideri, Cümhuriyyət Xalq Partiyasının (CHP) sədri Özgür Özəl, Barakın çıxışlarını "həddi aşan və antidemokratik" adlandıraraq, onun dərhal "arzuolunmaz şəxs" (persona non grata) elan edilməsini və ölkədən qovulmasını tələb edib.
"Səfirin bu sözləri Mustafa Kamal Atatürkün demokratiya üzərində qurduğu ölkəyə yaraşmır. Bir nəfərin bura gəlib bu şəkildə danışması həyasızlıqdır. Sözlərini geri götürməsə, bir dəqiqə belə bu ölkədə qalmamalıdır."-deyə o bildirib.
Səadət Partiyasının sədri Mahmud Arıkan da hökuməti hərəkətə keçməyə çağırıb. O, Türkiyə xarici siyasətinin xarici müdaxilə meydanı olmadığını vurğulayaraq bildirib ki, : "Bölgənin yalnız gücə hörmət etməsi fikri tarixi mədəniyyətdir. İmperialist güclər bu torpaqlarda həmişə məğlub olublar."
İsrail ilə "Gizli Alyans" mübahisəsi
Barakın Türkiyə və İsrail alyansını bölgənin rifahı üçün "ideal həll" adlandırması və tərəflər arasındakı gərginliyi "siyasi ritorika" kimi qiymətləndirməsi qəzəbi daha da artırıb. O, Ərdoğanı "böyük lider", Netanyahu isə "ölkəsi üçün lazım olanı edən şəxs" kimi təsvir edərək, gələcəkdə bu düşmənçilik ritorikasının yox olacağını proqnozlaşdırıb.
Brak həmçinin hər iki tərəfin mediasını tənqid edərək deyib ki, : "Təl-Əvivdə qəzeti açanda Vyana qapılarından Maldiv adalarına qədər uzanan 'Osmanlı İmperiyası' xəritəsini görürsünüz, Ankarada isə eyni ölçüdə 'Böyük İsrail' xəritəsi çəkilir. Bu maksimalist xəritələr və ritorikalar tarixi toqquşma xülyasını bəsləyir."
"Yenidən Rifah" Partiyasının sədri Fatih Ərbakan Barakın bu sözlərini qlobal güclərin bölgə üzərindəki planlarının "açıq etirafı" adlandırıb. O, Türkiyə ilə İsrail arasında hər hansı "gizli ittifaq" olması ehtimalını qəti şəkildə rədd edib və hökumətin bu "suverenliyə qəsd" edən çıxışlar qarşısında səssiz qalmasını tənqid edib. Ərbakan Xarici İşlər Nazirliyini dərhal səfiri çağırıb ona rəsmi nota verməyə çağırıb.
Xatırladaq ki, Tom Barak ötən il də Türkiyə və İsrail arasındakı gərginliyi "siyasi şou" adlandırdığı üçün Ankaranın narazılığına səbəb olmuşdu.