BAKI, AzerVoice, Nailə Babazadə
Türkiyə Prezidenti Rəcəb Tayyib Ərdoğan İstanbul Konqres Mərkəzində keçirilən 41-ci İSEDAK Toplantısı Açılış Mərasimində Suriyanın bərpası ilə bağlı mühüm açıqlamalar verib.
AzerVoice xəbər verir ki, Ərdoğan, qonşu ölkənin ən qısa zamanda əvvəlki günlərinə qayıtmasının Türkiyə üçün əsas prioritet olduğunu vurğulayıb.
“Qonşumuz Suriyanın yenidən ayağa qalxması, ən qısa zamanda əvvəlki günlərinə qayıtması əsas prioritetimizdir. Bu istiqamətdə İSEDAK çərçivəsində Suriyaya xüsusi dəstək proqramını da başladırıq.” - deyə Ərdoğan qeyd edib.
Prezident son toplantıdan bu yana Yaxın Şərq və dünya üzrə tarixi hadisələrə şahidlik etdiklərini deyib. O, Suriya xalqının 14 il boyunca ağır itkilər verdiyini, Baas rejimi və terror təşkilatlarının hücumlarında təxminən 1 milyon suriyalının həyatını itirdiyini, milyonlarla insanın isə Türkiyə də daxil olmaqla digər ölkələrə köç etmək məcburiyyətində qaldığını xatırladıb. Ərdoğan Türkiyənin suriyalı qaçqınlara qonaqpərvərlik göstərdiyini və qardaşlıq borcunu yerinə yetirməyə çalışdığını bildirib.
Ərdoğan qeyd edib ki, 8 Dekabr inqilabı ilə Suriyada ədalətsizlik sona çatıb və Prezident Əhməd Əş-Şəraanın rəhbərliyi ilə ölkə yenidən toparlanma prosesinə başlayıb. “Burada bir daha azadlıqları üçün canlarını fəda edən suriyalı qardaşlarımızı rəhmətlə yad edirəm. Suriyanın uzun fasilədən sonra İSEDAK Nazirlər Toplantısında təmsil olunmasından böyük məmnunluq duyuram” deyə o əlavə edib.
Prezident Türkiyənin nəqliyyatdan təhsilə, təhlükəsizlikdən ticarətə, səhiyyədən sosial xidmətlərə qədər suriyalıların yanında olacağını bildirib. O, ölkənin siyasi birliyi və torpaq bütövlüyünün qorunmasının, suriyalı qardaşların davamlı rifaha çatması üçün İSEDAK və İslam dünyasının dəstəyinin vacib olduğunu vurğulayıb. Ərdoğan, Suriyanın regional iqtisadiyyatlarla inteqrasiyasının həm ölkəyə, həm də bölgəyə konkret fayda verəcəyini deyərək, xüsusilə nəqliyyat layihələrinə fokuslanmağın həyati əhəmiyyət kəsb etdiyini əlavə edib.
Ərdoğan Suriyada iqtisadi inkişafın qarşısındakı sanksiyaların Türkiyənin təşəbbüsləri ilə mərhələli şəkildə aradan qaldırıldığını qeyd edib. Prezident, özəl sektorun investisiyalarını Suriyaya yönəltməsini təşviq etdiklərini bildirərək, İSEDAK çərçivəsində başlayan xüsusi dəstək proqramı ilə təhsil, mütəxəbi̇r mübadiləsi, ehtiyac analizi və fizibilite işləri kimi sahələrdə layihə dəstəkləri təqdim olunacağını açıqlayıb.
Ərdoğan proqramın tətbiqi mərhələsində üzv ölkələrin dəyərli töhfələr verəcəyinə ümid etdiyini bildirərək, Suriyanın yenidən ayağa qalxmasının Türkiyə üçün prioritet hədəf olduğunu bir daha vurğulayıb.