BAKI, AzerVoice

Suriya prezidenti Əhməd Əl-Şaraa sabah Səudiyyə Ərəbistanına edəcəyi səfəri çərçivəsində ABŞ Prezidenti Donald Trampla görüşə bilər.

AzerVoice xəbər verir ki, bu barədə "The National" qəzeti məlumat yayıb.

Məlumata görə, görüşün Fars Körfəzi Əməkdaşlıq Şurasının (GCC) sammiti çərçivəsində baş tutacağı bildirilir.

Suriya Xarici İşlər Nazirliyindən bir mənbənin sözlərinə görə, Ər-Riyad Tramp və Şaraa arasında 45 dəqiqəlik görüş keçirməyi təklif edib. Mənbə iddia edir ki, Tramp Dəməşqdəki yeni administrasiya rəhbərini dinləməyə razılaşıb, lakin ABŞ tərəfi bu görüşü hələlik rəsmi şəkildə təsdiqləməyib.

Suriyalı digər siyasi mənbə bildirib ki, Ər-Riyad Dəməşq və Vaşinqton arasında vasitəçilik missiyasını öz üzərinə götürüb. Onun sözlərinə görə, əgər görüş baş tutarsa, nəticəsi əsasən Səudiyyə Ərəbistanının mövqeyindən asılı olacaq. Görüşün əsas mövzusu ABŞ-ın Suriyaya qarşı tətbiq etdiyi sanksiyalarının ləğvi olacaq.

Qeyd edək ki, dünən Tramp Ağ Evdə jurnalistlərə açıqlamasında Türkiyə Prezidenti Rəcəb Tayyib Ərdoğanla birlikdə Suriya məsələsində, o cümlədən sanksiyaların aradan qaldırılması istiqamətində işləməyə hazır olduğunu bildirib. Tramp qeyd edib ki, ABŞ administrasiyası suriyalılara təmiz səhifədən başlamaq imkanı vermək istəyir.

Eyni zamanda, Tramp vəzifəyə başladıqdan sonra ilk dövlət səfəri çərçivəsində Səudiyyə Ərəbistanına gəlib. ABŞ ilə GCC arasında birgə sammitin sabah Ər-Riyadda keçirilməsi gözlənilir.

Xatırladaq ki, 2019-cu ildə Donald Tramp "Sezar Qanunu"nu imzalamışdı. Bu qanun ABŞ administrasiyasına Suriya hökumətinə birbaşa və dolayı dəstək göstərən şəxslərə və təşkilatlara qarşı sanksiyalar tətbiq etmək hüququ verir. Qanunun qəbulundan sonra tətbiq edilən bu sanksiyalar Suriyada mövcud olan iqtisadi böhranı daha da dərinləşdirmişdi.