BAKI,VOA, Fərid Mikayılov

İspaniyanın aparıcı klublarından olan Barselona mühüm oyunlar ərəfəsində ciddi itki ilə üzləşib.

VOA xəbər verir ki, klubun əsas hücumçularından biri olan Rafinya Braziliya millisində çıxış edərkən zədələnib və uzun müddət yaşıl meydanlardan uzaq qalacaq.

Məlumata görə, futbolçu Fransa ilə yoldaşlıq oyununda arxa əzələsindən zədə alıb. Tibbi müayinələr onun təxminən 5 həftə meydana çıxa bilməyəcəyini göstərib.

Barselonanın prezidenti Xuan Laporta isə yaranmış vəziyyətə görə FIFA-nın beynəlxalq oyun təqvimini sərt tənqid edib. O bildirib ki, sıx qrafik futbolçuların sağlamlığını risk altına qoyur və klubların maraqları nəzərə alınmır.

Baş məşqçi Hansi Flik üçün bu zədə ciddi problem yaradıb. Belə ki, Rafinya Çempionlar Liqasının 1/4 final mərhələsində Atletiko Madrid ilə oyunları və bir sıra vacib La Liqa qarşılaşmalarını buraxacaq.

Qeyd edək ki, braziliyalı futbolçu cari mövsümdə 19 qol və 8 məhsuldar ötürmə ilə komandanın əsas oyunçularından biri olub. Onun yoxluğu Barselonanın çempionluq mübarizəsinə ciddi təsir göstərə bilər.

Məlumata görə, klub rəhbərliyi yaranmış vəziyyətlə bağlı FIFA-ya rəsmi şikayət etməyə hazırlaşır.