BAKI, AzerVoice, Fərid Mikayılov

Bavariyanın müdafiəçisi Dayot Upamekano, müqaviləsi 2026-cı ildə başa çatdıqdan sonra Real Madridə transfer olmaq istəyini menecerinə çatdırıb.

AzerVoice xəbər verir ki, bu qərar, David Alabanın oxşar şəkildə Bavariya nəhənglərini tərk edib “Kral klubu”na keçməsini xatırladır.

Upamekano, Bernabeuda oynamaq arzusunu gerçəkləşdirmək üçün addım atır. Real Madrid isə son illərdə azad agentlərdən maksimum yararlanaraq David Alaba (Bavariya), Antonio Rudiger (Çelsi) kimi oyunçuları pulsuz heyətinə qatıb. Klub, oyunçuların müqavilə vəziyyətlərini diqqətlə izləyir və bu yolla transfer bazarında üstünlük qazanır.

Bavariya, daha əvvəl Alfonso Deyvisin müqavilə yeniləmə prosesində uzanan danışıqlardan dolayı çətinlik yaşamışdı. İndi isə Upamekano məsələsi klub rəhbərliyini oxşar situasiyada buraxıb - ya müqaviləni artırıb futbolçunun istədiyi maaşı verməli, ya oyunçunu vaxtından əvvəl satmalı, ya da onu 2026-cı ildə pulsuz itirmək riski ilə üzləşməlidir.

Fransalı müdafiəçi hazırda illik təxminən 10 milyon avro qazanır, lakin yeni müqavilə üçün 15 milyon avro civarında maaş tələb edir.

Keçən mövsüm 38 oyunda meydana çıxan Upamekano, Vinsent Kompaninin müdafiədə ən çox güvəndiyi adlardan biridir.

Real Madrid hazırda müdafiəyə transfer prioriteti verməsə də, Upamekanonu yaş, beynəlxalq təcrübə və Bundesliqa performansı baxımından uzunmüddətli perspektiv üçün uyğun variant kimi izləyir.