BAKI,VOA, Fərid Mikayılov
Bakıda “Türk Mətbəxi Həftəsi” çərçivəsində keçirilən tədbirdə ənənəvi türk yeməkləri təqdim edilib.
VOA xəbər verir ki, tədbir Türkiyə Prezidenti Rəcəb Tayyib Ərdoğanın həyat yoldaşı Əminə Ərdoğan tərəfindən dəstəklənən, Mədəniyyət və Turizm Nazirliyi tərəfindən hər il 21-27 may tarixlərində dünyanın müxtəlif ölkələrində keçirilən “Türk Mətbəxi Həftəsi” proqramı çərçivəsində Türkiyənin Bakı Səfirliyi və Bakı Yunus Emre İnstitutu (YEE) tərəfindən təşkil olunub.
Tədbirdə Türkiyənin Bakı Səfiri Birol Akgün, Azərbaycan Mədəniyyət Nazirliyinin müavini Sədadət Yusifova, müxtəlif ölkələrin diplomatik nümayəndələri və millət vəkilləri iştirak edib. Qonaqlara yayla çorbası, dolma, çiğköfte, kısır, içli köftə, lahmacun, mantı, tandır kababı, ayva və balqabağı şirniyyatları daxil olmaqla türk mətbəxinin klassik yeməkləri, desertlər və içkilər təqdim edilib.
Səfir Birol Akgün çıxışında qeyd edib ki, “Əminə Ərdoğanın da vurğuladığı kimi, tariximizin kök saldığı geniş coğrafiyada mədəniyyətlərin bilikləri ilə yoğrularaq bu günə gəlib çıxan Türk mətbəxi, mədəni diplomatiya çərçivəsində təqdim edə biləcəyimiz ən gözəl hekayələrdən biridir.”
O əlavə edib ki, minillik mədəniyyət, ənənə, ictimai irs və nəsildən-nəslə ötürülən zəngin təcrübə ilə formalaşan Türk mətbəxi dünyaya təqdim edilməyə davam edir. Bu ilki “Türk Mətbəxi Həftəsi” “İrs Masası” mövzusu ilə keçirilir və ənənəvi yeməklər yalnız təriflərdən ibarət olmayıb, insanları bir araya gətirərək ortaq anlayış və aidiyyət hissini gücləndirir.
Səfir Akgün vurğulayıb ki, nəsildən-nəslə ötürülən zəngin mətbəx irsini əks etdirən, davamlılıq və sıfır tullantı prinsiplərinə əsaslanan, sağlam və ənənəvi Türk mətbəxini tanıtmaq böyük məmnuniyyətdir.
