BAKI, AzerVoice
27 noyabr 2025-ci il tarixində Quba-Xaçmaz Regional Mədəniyyət İdarəsinin təşkilatçılığı ilə B.Səfəroğlu adına Quba rayon Mədəniyyət Mərkəzi və Quba Rayon Mərkəzləşdirilmiş Kitabxana Sistemi birgə “Korrupsiyaya qarşı mübarizədə cəmiyyətin rolu” mövzusunda maarifləndirici tədbir keçirib.
AzerVoice xəbər verir ki, tədbirdə Quba rayon İcra Hakimiyyəti hüquq şöbəsinin nümayəndəsi, Quba 1 saylı Mediasiya Təşkilatının direktoru və rayonun mədəniyyət işçiləri iştirak ediblər. Açılışda korrupsiyaya qarşı mübarizəyə dair kitab və nəşrlərdən ibarət sərgi nümayiş olunub, Azərbaycan Respublikasının Dövlət Himni səsləndirilib və ümummilli lider Heydər Əliyevin, həmçinin torpaqlarımızın müdafiəsi uğrunda şəhid olanların xatirəsi ehtiramla anılıb.
Çıxışlarda Azərbaycan Respublikasının Korrupsiyaya qarşı mübarizə qanunundan irəli gələn vəzifələr və vətəndaşların bu sahədə qanun çərçivəsində aktiv fəaliyyəti barədə məlumat verilib. Tədbir iştirakçılarının sualları hüquqşünaslar tərəfindən cavablandırılıb, sonda isə maarifləndirici video-çarx nümayiş etdirilib.
