BAKI, AzerVoice
Şabran şəhərində yerləşən Heydər Əliyev Mərkəzində, Azərbaycan Respublikasında 2025-ci ilin “Konstitusiya və Suverenlik İli” elan olunması münasibətilə “Konstitusiya və Mediasiya: Hüquqi dövlətin dialoq platforması” adlı maarifləndirici tədbir keçiriib.
AzerVoice xəbər verir ki, tədbir Şabran Rayon İcra Hakimiyyəti və Quba 1 saylı Mediasiya Təşkilatının birgə təşkilatçılığı ilə baş tutdu. Görüşün əsas məqsədi hüquqi dövlət quruculuğunda alternativ mübahisə həll yolları, xüsusilə mediasiyanın tətbiqi ilə bağlı ictimai məlumatlılığın artırılması idi.
Tədbirdə Şabran Rayon İcra Hakimiyyəti başçısının müavini Natavan Mustafayeva, Şabran RİH-nin hüquq şöbəsinin müdiri Ramin Ağayev, Şabran RPŞ-nin yetkinlik yaşına çatmayanlarla iş üzrə inspektoru, polis leytenantı Gülnar Dadaşova, Şabran rayon Heydər Əliyev Mərkəzinin direktoru Təvəkkül Əliyev və Quba 1 saylı Mediasiya Təşkilatının direktoru Hümmət Əliyev qonaq qismində çıxış ediblər.
Çıxışlarda mediasiya institutunun hüquqi sistemdəki rolu, üstünlükləri və yerli səviyyədə tətbiqi geniş müzakirə olundu. Qonaqlar mediasiyanın mübahisələrin daha az xərcli, çevik və qarşılıqlı anlaşmaya əsaslanan həllini təmin etdiyini vurğuladılar. Həmçinin, vətəndaşların hüquqlarının qorunmasında mediasiyanın effektiv mexanizm olduğu qeyd edildi.
Tədbirdə təqdim edilən əsas mövzular mediasiyanın mahiyyəti, prinsipləri və hüquqi çərçivəsi, qanunvericilikdən irəli gələn öhdəliklər və vətəndaş hüquqları, real mübahisə nümunəsi əsasında praktik təcrübə paylaşımı və ailə və əmək mübahisələrinin mediasiya yolu ilə həlli olub.
Tədbirin sonunda Quba 1 saylı Mediasiya Təşkilatının direktoru Hümmət Əliyev çıxış edərək tədbirin yüksək səviyyədə təşkilinə töhfə verən tərəfdaşlara və fəal iştirakçılara təşəkkürünü bildirdi. Daha sonra qonaqlara Quba 1 saylı Mediasiya Təşkilatı adından təşəkkürnamələr təqdim edildi və tədbir iştirakçıları ilə xatirə fotosu çəkildi.
