BAKI, AzerVoice

Birləşmiş Millətlər Təşkilatının Humanitar Məsələlərin Koordinasiya Ofisi (OCHA) Sudanın qərbindəki Şimali Darfur əyalətində, xüsusilə paytaxt Faşir və ətrafındakı məcburi köçkün düşərgələrində "böhran səviyyəsində" sağlamlıq problemlərinin yaşandığını bildirib.

AzerVoice xəbər verir ki, BMT-nin son brifinqində qeyd edilib ki, davam edən münaqişə onsuz da kövrək olan səhiyyə sistemini çökdürüb, geniş yerdəyişmələrə səbəb olub və insanların ən əsas tibbi ehtiyaclarını belə qarşılamasını çətinləşdirib.

Məlumata görə, Faşirdə 200-dən çox səhiyyə müəssisəsi fəaliyyətini dayandırıb, tibbi heyət çatışmazlığı və həyati əhəmiyyətli dərmanların yoxluğu kritik vəziyyət yaradıb.

OCHA vurğulayıb ki, humanitar təşkilatlar tibbi ləvazimatların təmin olunması üçün çalışsalar da, təhlükəsizlik problemləri və giriş məhdudiyyətləri onların işinə ciddi maneə törədir.

Ümumdünya Səhiyyə Təşkilatı (ÜST) bildirib ki, Sudanın münaqişədən zərər çəkmiş ərazilərində xəstəxana və səhiyyə müəssisələrinin 70%-dən çoxu fəaliyyət göstərmir və milyonlarla insan tibbi yardımdan məhrumdur.

BMT ofisi xəbərdarlıq edib ki, Sudan səhiyyə sisteminə davamlı hücumlar edilir və fevralın ortalarına qədər ölkədə səhiyyə obyektlərinə ən azı 150 hücum qeydə alınıb. Real rəqəmin isə daha yüksək olduğu ehtimal edilir.