BAKI, AzerVoice

Qəzzaya son iki həftə ərzində göndərilən humanitar yardım, bölgədəki əhalinin ehtiyaclarının cəmi 9 faizini ödəyib.

AzerVoice xəbər verir ki, bu barədə BMT-nin Yaxın Şərq üzrə Fələstinli Qaçqınlara Yardım və İşlər Agentliyinin (UNRWA) müşaviri Adnan Əbu Həsnə məlumat verib.

Onun sözlərinə görə, paylanan ərzaq səbətləri, yardım gözləyən 2 milyondan çox insanın ehtiyaclarını yalnız cüzi dərəcədə qarşılayır.

"Son 17 gündə Qəzzaya cəmi 800 yardım maşını daxil olub və bu da əhalinin əsas ehtiyaclarının yalnız 9 faizini qarşılayır. Qəzzada aclıq və qida çatışmazlığı sürətlə artır, səhiyyə sistemi çökmək üzrədir, içməli suyun keyfiyyəti isə fəlakət həddindədir" - deyə, Əbu Həsnə edib.

O əlavə edib ki, İsrail hələ də Qəzzada UNRWA-nın infrastrukturunu dağıtmağa çalışır.

Xatırladaq ki, martın 18-də İsrail ordusu Qəzzada genişmiqyaslı hava zərbələri ilə atəşkəsi pozaraq döyüş əməliyyatlarına yenidən başlayıb. İsrailin Baş naziri Binyamin Netanyahunun ofisi bu əməliyyatların səbəbini, ABŞ Prezidenti Donald Trampın xüsusi nümayəndəsi Stiven Uitkoff və digər vasitəçilərin təkliflərini qəbul etmədiyi üçün HƏMAS-ın məsuliyyət daşıdığını bildirib və əməliyyatın məqsədinin bütün girovları azad etmək olduğunu açıqlayıb. HƏMAS isə döyüşlərin bərpasına görə məsuliyyəti İsrail və ABŞ-ın üzərinə atıb.