Osmanlı imperiyasına aid ilk qanunlar toplusu Fateh Sultan Mehmedin dövründən qalmışdır. Lakin bu qanunnamənin onun hakimiyyəti illərində qələmə alınmadığı, mühüm bir hissəsinin sonrakı tarixlərdə yazıldığı və tamamilə ona aid olmadığı barədə iddialar irəli sürülmüşdür. Həmçinin qanunnamədə dövlət təşkilatına dair yer alan bəzi məqamların daha sonrakı dövrlərdə meydana çıxdığı, bu səbəbdən də mətnin Fatehin dövründə yazılmış ola bilməyəcəyi iddia olunur.

Halil İnalcık və Əbdülqadir Özcan kimi tanınmış Osmanlı tarixçilərinin apardıqları elmi araşdırmalar isə bu iddiaların həqiqəti əks etdirmədiyini və qanunnamənin cüzi bir hissəsi istisna olmaqla, birbaşa Fateh Sultan Mehmedə aid olduğunu sübut etmişdir. Bu gün əlimizdə olan qanunnamə mətni II Bəyazid dövründə edilmiş bəzi əlavələri də özündə ehtiva edir.

Qardaş qətli məsələsini Fatehin adına yaraşdırmayanlar və onun nüfuzuna kölgə salmamaq istəyənlər bu qanunnamənin qərblilər tərəfindən uydurulduğunu irəli sürürlər. Onlar qanunnamənin yalnız tək nüsxə halında Vyana arxivlərində tapılmasını da öz iddialarına dəlil kimi göstərirlər.

Lakin aparılan dərin tarixi tədqiqatlar qanunnamənin tək nüsxədən ibarət olmadığını, Osmanlı tarixi mənbələrində digər nüsxələrinin də mövcud olduğunu qəti şəkildə üzə çıxarmışdır.