BAKI,VOA,Yusif Şərifzadə

İsrail ordusu Livanın cənubunda yerləşən qədim Sur şəhəri ətrafında hərbi əməliyyatlarını davam etdirib. Məlumata görə, sərhədyanı yaşayış məntəqələrində bir sıra binalar partladılıb.

VOA xəbər verir ki, Livanın rəsmi Milli Xəbər Agentliyinin yaydığı məlumata əsasən, İsrail qüvvələri Məcdəl Zun, Əl-Mənsuri və Bint Cübeyl qəsəbələrində binaları partladıb. Partlayışların səsi qədim Sur şəhərində də eşidilib.

Agentliyin məlumatına görə, İsrail ordusu Nəbətiyyə rayonunun Əl-Qusayr kəndində də genişmiqyaslı partlayış həyata keçirib. Hadisələr nəticəsində mümkün itkilər və dağıntıların miqyası barədə hələlik rəsmi məlumat açıqlanmayıb.

İsrail hərbi qüvvələrinin Livanın cənubundakı əməliyyatları ötən ay ABŞ-nin vasitəçiliyi ilə Tel-Əviv və Beyrut arasında əldə olunmuş çərçivə razılaşmasına baxmayaraq davam edir. Həmin razılaşma İsrail qüvvələrinin Livan ərazilərindəki hərbi mövcudluğuna mərhələli şəkildə son qoyulmasını nəzərdə tutur.

İsrail tərəfi son əməliyyatlarla bağlı hələlik rəsmi açıqlama verməyib.