BAKI,VOA,Yusif Şərifzadə
Hörmüz boğazında gəmi hərəkətinin demək olar ki, dayanması bölgədə nəqliyyat və ticarət marşrutlarını dəyişdirib. Nəticədə bəzi körfəz limanlarında yük dövriyyəsi artıb.
VOA xəbər verir ki, Hörmüz boğazındakı vəziyyət ərzaq, yanacaq, gübrə və müxtəlif sənaye sahələrinin təchizatına təsir göstərsə də, yük daşımalarının bir hissəsi alternativ limanlara yönəldilib.
Məlumata görə, Qətərin paytaxtı Doha yaxınlığında yerləşən Həməd limanında gəmi hərəkəti normal qaydada davam edir. Rəsmilər limanın Hörmüz böhranı dövründə fəaliyyətinin dayanmadığını bildirirlər.
Eyni zamanda, Birləşmiş Ərəb Əmirliklərində yerləşən Cəbəl Əli və Xor Fəkkan limanları, eləcə də Omandakı Suhar limanı istiqaməti dəyişdirilən yük axınını qəbul edərək fəaliyyətlərini genişləndiriblər.
Müşahidəçilər hesab edirlər ki, Hörmüz boğazındakı məhdudiyyətlər körfəz regionunda alternativ nəqliyyat marşrutlarının əhəmiyyətini daha da artırıb.