BAKI,VOA,Yusif Şərifzadə

Kanada hökuməti futbol üzrə dünya çempionatını ölkənin beynəlxalq nüfuzunu artırmaq, yeni investisiyalar cəlb etmək və iqtisadi əlaqələri genişləndirmək üçün mühüm fürsət hesab edir.

VOA xəbər verir ki, Kanadanın Baş naziri Mark Karni ölkənin dünya səhnəsində daha fəal rol oynamaq niyyətində olduğunu vurğulayıb.

Rəsmi Ottava hesab edir ki, dünya çempionatı zamanı milyonlarla insanın diqqətinin Kanadaya yönəlməsi ölkənin iqtisadi və investisiya potensialının tanıdılması üçün unikal imkan yaradır.

Mark Karni bildirib ki, Kanada xarici sərmayələrə açıqdır və turnir müddətində yaranan beynəlxalq diqqətdən maksimum istifadə etməyə çalışır.

Hökumətin əsas məqsədlərindən biri sentyabr ayında keçiriləcək Kanada İnvestisiya Zirvəsinə dünyanın ən böyük investorlarını cəlb etməkdir.

Planlara əsasən, növbəti beş il ərzində iqtisadiyyata təxminən bir trilyon Kanada dolları həcmində sərmayənin cəlb olunması hədəflənir.

Bu vəsaitin enerji layihələri, dəmir yolları, limanların genişləndirilməsi və digər iri infrastruktur layihələrinin maliyyələşdirilməsinə yönəldilməsi nəzərdə tutulur.

Toronto şəhərinin rəsmiləri isə dünya çempionatı vasitəsilə şəhərin çoxmədəniyyətli simasını nümayiş etdirməyə çalışırlar.

Şəhər rəhbərliyinin məlumatına görə, Torontoda 250 müxtəlif dildə danışılır və bu müxtəliflik şəhərin əsas üstünlüklərindən biri hesab olunur.

Bununla yanaşı, turizm və mehmanxana sektoru gözlənilən qədər yüksək marağın qeydə alınmadığını bildirir. Məlumata görə, Toronto şəhərində satılan biletlərin təxminən yarısı yerli tamaşaçılar tərəfindən alınıb.