BAKI,VOA, Nailə Babazadə

Rusiya Prezidenti Vladimir Putin Sankt-Peterburqda İranın xarici işlər naziri Abbas Əraqçini qəbul edərək, iki ölkə arasındakı münasibətlərin sarsılmaz strateji tərəfdaşlıq səviyyəsində olduğunu bəyan edib.

VOA xəbər verir ki, görüşdə Rusiya XİN rəhbəri Sergey Lavrov və GRU rəisi İqor Kostyukovun iştirakı müzakirələrin həm diplomatik, həm də hərbi-strateji əhəmiyyətini nümayiş etdirib.

Putin çıxışı zamanı İran xalqının ABŞ və İsrail hücumlarına qarşı apardığı mübarizəni "qəhrəmanlıq" adlandırıb və İranın yeni lideri Müctəba Xameneidən aldığı mesaj üçün təşəkkürünü bildirib. O, Rusiyanın Yaxın Şərqdə sülhün bərpası üçün mümkün olan hər şeyi edəcəyini və yeni rəhbərlik dövründə də Tehranla strateji əməkdaşlığın qətiyyətlə davam etdiriləcəyini vurğulayıb.

Öz növbəsində, Abbas Əraqçi Rusiyanın çətin anlarda İranın yanında duran sadiq müttəfiq olduğunu qeyd edib. O, Ayətullah Əli Xameneinin vəfatı ilə bağlı verilən başsağlığına və yeni liderin dəstəklənməsinə görə Putinə minnətdarlığını çatdırıb. Əraqçi həmçinin Müctəba Xamenei və Prezident Pezeşkiyanın salamlarını çatdıraraq, bölgədəki hərbi-siyasi vəziyyət barədə Rusiya tərəfinə ətraflı məlumat verib.