BAKI,VOA, Fərid Mikayılov

ABŞ-da son dövrlərdə itkin düşən və ya qeyri-müəyyən şəraitdə həyatını itirən alimlərlə bağlı iddialar geniş müzakirələrə səbəb olub.

VOA xəbər verir ki, mövzu üzrə araşdırmanın FTB və digər federal qurumların iştirakı ilə aparılacağı bildirilib.

Ağ Evin mətbuat katibi Karolin Levitt sosial şəbəkə platforması X üzərindən açıqlamasında hökumətin “FTB və aidiyyəti bütün qurumlarla birlikdə işlədiyini” deyib.

O, son aylarda baş verən hadisələrlə bağlı ciddi sualların olduğunu, bütün ehtimalların araşdırılacağını və heç bir versiyanın istisna edilməyəcəyini vurğulayıb.

Məsələ ABŞ prezidenti Donald Trampın da diqqətinə çatdırılıb. Tramp hadisələrin əlaqəli olub-olmadığının araşdırılması üçün FTB-yə göstəriş verib və məsələnin “ciddi” olduğunu bildirib.

İddialara görə, son aylarda kosmos və müdafiə sahələrində çalışan təxminən 10-a yaxın alimin itkin düşməsi və ya müəmmalı ölüm halları qeydə alınıb. Sosial şəbəkələrdə isə bu hadisələrin mümkün xarici müdaxilə və ya koordinasiyalı əməliyyatlarla bağlı ola biləcəyi barədə fərziyyələr yayılıb.

Rəsmi qurumlar isə indiyədək bu hadisələr arasında birbaşa əlaqə olduğuna dair hər hansı sübut təqdim etməyib. Araşdırmanın nəticələrinin hadisələrin təsadüfi, yoxsa əlaqəli təhlükəsizlik riski olub-olmadığını müəyyənləşdirməsi gözlənilir.