BAKI,VOA, Fərid Mikayılov

Avropa Komissiyasının rəhbəri Ursula von der Leyen Macarıstanda keçirilən seçkilərin nəticələrinə operativ münasibət bildirib.

VOA xəbər verir ki, von der Leyen Viktor Orbanın məğlubiyyətindən cəmi 17 dəqiqə sonra sosial şəbəkədə paylaşım edərək Macarıstanın Avropa yolunu seçdiyini vurğulayıb.

Məlumata əsasən, o, ölkənin yenidən Avropa İttifaqı ilə yaxınlaşmasının vacibliyini qeyd edib və bu qərarın birliyin güclənməsinə töhfə verəcəyini bildirib.

Qeyd olunub ki, Viktor Orban uzun illər Avropa Komissiyasının siyasətinə qarşı çıxan liderlərdən biri kimi tanınıb.

Bildirilib ki, Avropa Xalq Partiyasının rəhbərliyi də seçkilərin nəticələrini müsbət qiymətləndirərək bunu Macarıstan xalqının qələbəsi kimi dəyərləndirib.

Məlumata görə, seçkilərdə Peter Maqarın rəhbərlik etdiyi müxalif qüvvə parlamentdə üstünlük əldə edərək hökuməti formalaşdırmaq imkanı qazanıb.

Avropa liderləri, o cümlədən Fransa Prezidenti Emmanuel Makron da yeni hökuməti təbrik edərək Avropada əməkdaşlığın gücləndirilməsinin vacibliyini vurğulayıb.