BAKI,VOA, Fərid Mikayılov
Vatikan rəhbəri Papa XIV Leo ABŞ Prezidenti Donald Trampın sərt tənqidlərinə münasibət bildirib.
VOA xəbər verir ki, Papa açıqlamasında Tramp administrasiyasından qorxmadığını və müharibələrə qarşı çıxışlarını davam etdirəcəyini vurğulayıb.
Məlumata əsasən, Afrika səfəri zamanı jurnalistlərin suallarını cavablandıran pontifik bildirib ki, o siyasətçi deyil və fəaliyyətini dini dəyərlər, sülh və ədalət prinsipləri üzərində qurur.
Qeyd olunub ki, Papa müharibələrin dayandırılması, dialoqun gücləndirilməsi və çoxtərəfli əməkdaşlığın artırılmasının vacibliyini vurğulayıb. O, günahsız insanların həyatını itirməsinin qəbuledilməz olduğunu qeyd edib.
Bildirilib ki, Donald Tramp daha əvvəl Papa XIV Leonu sərt şəkildə tənqid edərək onu xarici siyasət və təhlükəsizlik məsələlərində zəif mövqedə olmaqda ittiham etmişdi.
Papa isə bu tənqidlərə baxmayaraq, müharibəyə qarşı mövqeyini dəyişməyəcəyini və sülh çağırışlarını davam etdirəcəyini bəyan edib.