BAKI,VOA, Nailə Babazadə

Avropa İttifaqı (Aİ) Komissiyasının sözçüsü Anna-Kaisa İtkonen, ABŞ və İran arasında əldə olunmuş müvəqqəti atəşkəsə rəğmən, Avropada enerji qiymətlərinin qısa müddətdə enməyəcəyini bəyan edib.

VOA xəbər verir ki, Brüsseldə keçirilən gündəlik mətbuat konfransında danışan İtkonen, qlobal enerji bazarlarındakı qeyri-müəyyənliyin davam etdiyini vurğulayıb.

Sözçü hazırda Avropada müşahidə olunan yüksək enerji qiymətlərinə səbəb olan hərbi münaqişənin və böhranın tezliklə başa çatmayacağı barədə xəbərdarlıq edib. "Bu böhranın qısamüddətli olacağına dair özümüzü aldatmamalıyıq. Belə olmayacaq" deyən İtkonen, enerji təhlükəsizliyi ilə bağlı risklərin hələ də ciddi olduğunu qeyd edib.

İtkonen Avropa İttifaqının Hörmüz boğazı vasitəsilə həyata keçirdiyi enerji tədarükünün statistik göstəricilərini də açıqlayıb. O bildirib ki, Aİ-nin idxal etdiyi mayeləşdirilmiş təbii qazın (LNG) təxminən 8,5 faizi, xam neft və neft məhsullarının isə təxminən 7 faizi birbaşa Hörmüz boğazından keçir. Bu tədarükün əsas hissəsi İraq, Küveyt, Səudiyyə Ərəbistanı və Birləşmiş Ərəb Əmirliklərinin payına düşür.

Xüsusilə dizel yanacağı və təyyarə yanacağı (jet fuel) məsələsinə toxunan sözçü, bu sahədə asılılığın daha yüksək olduğunu diqqətə çatdırıb. Məlumata görə, Avropanın bu növ yanacaq tədarükünün təxminən 40 faizi sözügedən strateji boğaz vasitəsilə həyata keçirilir. Qlobal miqyasda isə dünya üzrə neft və LNG daşınmalarının 20 faizinin Hörmüz boğazından keçdiyini xatırladan İtkonen, bu marşrutun istənilən halda Avropa bazarları üçün həyati əhəmiyyət daşıdığını qeyd edib.