BAKI,VOA, Nailə Babazadə

ABŞ-ın vitse-prezidenti Cey Di Vens 12 apreldə keçiriləcək ümumi seçkilər ərəfəsində Macarıstanda Baş nazir Viktor Orbanla Budapeştdə bir araya gəlib və görüşdən sonra birgə mətbuat konfransında çıxış edib.

VOA xəbər verir ki, Vens çıxışında Orbanın liderliyini tərifləyərək, enerji siyasəti və Qərb dəyərləri məsələsində Macarıstanı nümunə göstərib. O, Brüsseldəki bürokratları tənqid edərək onların Macarıstan xalqını sıxışdırdığını və ölkəni enerji cəhətdən asılı vəziyyətə salmağa çalışdıqlarını iddia edib.

"Prezident Trampın dediyi kimi, bu müharibə çox yaxında sona çatacaq"
Cey Di Vens ABŞ-ın İranla bağlı hərbi hədəflərini böyük ölçüdə reallaşdırdığını qeyd edərək deyib: "Hələ də etmək istədiyimiz bəzi şeylər var. Məsələn, İranın silah istehsal etmə qabiliyyəti ilə bağlı hərbi cəhətdən bir az daha işləmək istədiyimiz məqamlar mövcuddur. Lakin əsasən, ABŞ-ın hərbi hədəfləri tamamlanıb. Bu isə o deməkdir ki, Prezident Trampın söylədiyi kimi, bu müharibə çox yaxında sona çatacaq".

Nəticənin necə olacağının iranlılardan asılı olduğunu bildirən Vens, İranın qarşısında iki yol olduğunu vurğulayıb: "Birinci yol iranlıların normal bir ölkə olmağa qərar verməsi, terroru maliyyələşdirməyi dayandırması və dünya ticarət sisteminin bir hissəsi olmasıdır. Bu, onlar üçün iqtisadi dirçəliş və dünya barışı deməkdir. İkinci variant isə İranın danışıqlar masasına gəlməməsi və qonşularını terrorizə etməyə davam etməsidir ki, bu halda ölkədəki iqtisadi vəziyyət çox pisləşəcək".