BAKI,VOA, Nailə Babazadə

İndoneziya hökuməti şənbə günü verdiyi bəyanatda Livanda üç sülhməramlısının yaralanması ilə nəticələnən partlayışı kəskin şəkildə pisləyib. Bu hadisə bir neçə gün əvvəl eyni ölkədən olan üç "mavi dəbilqəli" əsgərin həlak olmasından dərhal sonraya təsadüf edir.

VOA xəbər verir ki, Birləşmiş Millətlər Təşkilatının Livandakı Müvəqqəti Qüvvələri (UNIFIL) cümə günü günortan saatlarında Adaisseh yaxınlığındakı BMT obyektində baş verən partlayış nəticəsində üç sülhməramlının yaralandığını bildirib. Yaralılardan ikisinin vəziyyəti ağırdır. Cakartadakı BMT İnformasiya Mərkəzi partlayışın mənbəyinin hələlik məlum olmadığını, lakin yaralıların İndoneziya vətəndaşları olduğunu təsdiqləyib.

İndoneziya Xarici İşlər Nazirliyi bu cür təkrarlanan insidentlərin qəbuledilməz olduğunu bəyan edərək, BMT Təhlükəsizlik Şurasını hadisəni araşdırmağa çağırıb. Nazirlik sülhməramlıların mühafizəsinin gücləndirilməsi üçün UNIFIL-ə qoşun verən ölkələrin təcili toplantısının keçirilməsini tələb edir.

Xatırladaq ki, martın 29-da Livandakı partlayış nəticəsində bir İndoneziya əsgəri həlak olmuşdu. BMT-dəki mənbələrin verdiyi məlumata görə, həmin hücuma görə İsrail tankından açılan atəş məsuliyyət daşıyır. Bu hadisədən cəmi bir gün sonra logistik karvana edilən hücumda daha iki İndoneziya sülhməramlısı həyatını itirib. 33 yaşlı şəhid Zulmi Aditya İskəndərin ailəsi sülhməramlıların müharibə üçün deyil, sülh üçün orada olduqlarını vurğulayaraq yaşananlara kədərlərini ifadə edib.

Həlak olan üç sülhməramlının nəşi şənbə günü axşam saatlarında Cakartaya çatdırılacaq. Baş verən itkilərə baxmayaraq, İndoneziya Silahlı Qüvvələri planlaşdırılan növbə rotasiyası çərçivəsində gələn ay Livana 750-dən çox yeni şəxsi heyət göndərəcəyini açıqlayıb.