BAKI, VOA, Nailə Babazadə

İsrailin dövlət televiziyası KAN-ın adı açıqlanmayan yüksək rütbəli rəsmiyə istinadən yaydığı məlumata görə, ABŞ və İran arasında aparılan danışıqlar müsbət nəticə vermir.

VOA xəbər verir ki, xəbərdə iddia olunur ki, Vaşinqton və Tel-Əviv yaxın günlərdə tətbiq ediləcək daha sərt hərbi və siyasi addımlar barədə tam koordinasiya şəraitində hərəkət edirlər. Diplomatik kanalların tıxanması tərəfləri regional gərginliyi artıra biləcək yeni əməliyyat planlarını nəzərdən keçirməyə vadar edib.

İran rəhbərliyinin ABŞ-ın təkliflərinə necə cavab verəcəyi ilə bağlı daxili ixtilaflar yaşadığı bildirilir. İddialara görə, bəzi yüksək rütbəli İran rəsmiləri iqtisadi və hərbi təzyiqlərin azaldılması üçün müsbət cavab verilməsinin tərəfdarı olsa da, digər qrup mübarizənin sonadək davam etdirilməsi fikrini müdafiə edir. Bu daxili parçalanma Tehranın danışıqlar masasındakı mövqeyini zəiflədir və Vaşinqtonun sərt ritorikasını daha da gücləndirir.

Bununla belə, İsrail rəhbərliyi ABŞ Prezidenti Donald Trampın gözlənilən çıxışında əldə olunan hərbi uğurlarla kifayətlənib hücumları dayandıracağını elan edə biləcəyindən narahatdır. Tel-Əvivdə ehtiyat edirlər ki, Tramp İranın ali rəhbərliyindəki kadr dəyişikliklərini əsas gətirərək kampaniyanı vaxtından əvvəl yekunlaşdıra bilər. İsrail tərəfi hesab edir ki, İranın hərbi potensialı tamamilə zərərsizləşdirilmədən əməliyyatların dayandırılması gələcəkdə region üçün daha böyük təhdid yarada bilər.