BAKI,VOA, Nailə Babazadə
ABŞ-ın müdafiə naziri Pit Heqset ABŞ və İsrail qüvvələrinin İranın Hörmüzqan əyalətində yerləşən ibtidai məktəbə endirdiyi zərbə ilə bağlı rəsmi təhqiqatın başladıldığını bildirib.
VOA xəbər verir ki, Heqset mətbuata verdiyi açıqlamada Minab şəhərindəki "Şəcərətüt-Tayyibə" qızlar məktəbinin bombalanması ilə bağlı sualları cavablandırıb.
"Deyə biləcəyim tək şey hadisəni araşdırdığımızdır" deyən nazir, ABŞ ordusunun mülki hədəfləri heç vaxt qəsdən hədəf almadığını müdafiə edib.
İran dövlət televiziyasının yaydığı məlumata görə, fevralın 28-də ABŞ və İsrailin Hörmüzqan əyalətinin Minab şəhərindəki qızlar məktəbinə təşkil etdiyi hücum ağır fəsadlara yol açıb. Rəsmi Tehran bu faciə nəticəsində 153 şagird və müəllimin həyatını itirdiyini bəyan edib. Hadisə beynəlxalq ictimaiyyətdə geniş əks-səda doğurub və humanitar böhranla bağlı narahatlıqları artırıb.