BAKI,VOA, Nailə Babazadə
Şri-Lankanın Qalle şəhəri açıqlarında İran hərbi dəniz qüvvələrinə məxsus gəmi "sos" siqnalı göndərdikdən sonra batıb.
VOA xəbər verir ki, İran hərbi donanmasına aid IRIS Dena gəmisi qəzaya uğrayıb və Şri-Lanka rəsmiləri dərhal genişmiqyaslı xilasetmə əməliyyatına başlayıb.
Şri-Lanka rəsmiləri gəminin təcili yardım çağırışı etdikdən qısa müddət sonra batdığını təsdiqləyiblər. İlkin ehtimallara görə, hərbi gəmi xarici sualtı qayıq tərəfindən hücuma məruz qalıb. Beynəlxalq mediada gəminin ABŞ və ya İsrail qüvvələri tərəfindən hədəf alınma ehtimalı geniş müzakirə olunur.
Gəmidə təxminən 180 nəfərin olduğu bildirilir. Son məlumatlara görə, 78 dənizçi yaralı halda xilas edilərək müalicə altına alınıb. Lakin azı 101 nəfər dənizçi hələ də itkin sayılır.
Hazırda itkin düşənlərin tapılması üçün Şri-Lanka hərbi dəniz qüvvələri tərəfindən axtarış-xilasetmə tədbirləri davam etdirilir. Hadisənin dəqiq səbəblərini müəyyənləşdirmək məqsədilə rəsmi təhqiqat başladılıb.