BAKI, VOA, Nailə Babazadə

İsrailin müdafiə naziri İsrael Kats, ABŞ ilə ortaq şəkildə İrana qarşı başlatdıqları hücumların "lazım olduğu müddətcə" davam edəcəyi ilə hədələyib. Katsın sözlərinə görə, gecə saatlarında İsrail ordusu Tehranın strateji hədəflərini uğurla vurub.

VOA xəbər verir ki, nazir Kats sosial media hesabında etdiyi açıqlamada, İranın raket buraxılış gücünə və strateji infrastrukturuna ciddi zərər vurduqlarını iddia edib. O, bu əməliyyatların məqsədini belə izah edib: İranın hərbi potensialını məhv etmək, nüvə silahı və raket istehsalını dayandırmaq, həmçinin İran xalqının rejimi devirməsi üçün zəruri şərait yaratmaq. Kats həmçinin əlavə edib ki, İrandan sonra əsas diqqət Livana yönəldiləcək.

İsrail ordusundan verilən rəsmi məlumata görə, hücumlar zamanı paytaxt Tehrandakı dövlət binaları kompleksi birbaşa hədəfə alınıb. Bildirilib ki, Prezident iqamətgahı, İran Milli Ali Təhlükəsizlik Şurasının binası, zabitlərin təlim keçdiyi hərbi təhsil müəssisəsi və digər mühüm infrastruktur obyektləri çox sayda sursatla vurulub. Ordu hədəf alınan nöqtələri əks etdirən 3D görüntülər də paylaşıb.