BAKI, VOA, Nailə Babazadə
ABŞ-ın Dövlət katibi Marko Rubio İranın ballistik raket proqramı və regional təhlükəsizliyə təhdidləri ilə bağlı mühüm bəyanatlar verib.
VOA xəbər verir ki, Karib dənizi ölkəsi olan Sent-Kits və Nevisə səfəri zamanı ABŞ mətbuatına açıqlama verən Rubio, Tehranın ballistik raketlər mövzusunda müzakirələrdən yayınmasını "böyük problem" kimi xarakterizə edib.
Rubio qeyd edib ki, İranın malik olduğu çoxsaylı ballistik raketlər, xüsusilə də qısa mənzilli olanlar ABŞ-ın regiondakı hərbi bazalarını və tərəfdaşlarını birbaşa hədəf alır. O, Birləşmiş Ərəb Əmirlikləri (BƏƏ), Qətər və Bəhreyndəki bütün Amerika bazalarının bu raketlərin mənzili daxilində olduğunu vurğulayıb. Dövlət katibi həmçinin Tehranın dəniz nəqliyyatını və ABŞ Hərbi Dəniz Qüvvələrini təhdid edən hərbi elementlərə sahib olduğunu iddia edərək deyib:
"Hər kəsin şunu anlamasını istəyirəm: Nüvə proqramından başqa, onların yalnız Amerikaya və amerikalılara hücum etmək üçün nəzərdə tutulmuş konvensional silahları da var."
Müzakirələrin əsasən nüvə proqramına yönəldiyini bildirən Rubio, raket məsələsinin də mütləq həll edilməli olduğunu vurğulayıb. O, ABŞ Prezidentinin diplomatik həll yoluna üstünlük verdiyini, lakin İranın ballistik raketlər barədə hər hansı tərəflə danışmaqdan imtina etməsinin irəliləyişə ciddi maneə törətdiyini qeyd edib.
Xatırladaq ki, 2025-ci ilin iyun ayında İsrail və ABŞ-ın İrana yönəlik hücumları səbəbindən kəsilən nüvə danışıqları, Türkiyə başda olmaqla region ölkələrinin təşəbbüsü və Omanın vasitəçiliyi ilə yenidən canlanıb.
Fevralın 6-da Omanda baş tutan dolayı təmaslardan sonra tərəflər fevralın 17-də Cenevrədə ikinci tur görüşləri keçiriblər. Danışıqlarda müəyyən irəliləyişin olduğu bildirilsə də, tərəflərin bu gün – 26 fevral tarixində Cenevrədə yenidən bir araya gəlməsi planlaşdırılır.
Hazırkı mərhələdə İran sanksiyaların ləğvini tələb edir, ABŞ isə Tehranın uran zənginləşdirmə fəaliyyətlərini tamamilə dayandırmasını və əlindəki yüksək dərəcəli zənginləşdirilmiş uran ehtiyatının ölkə xaricinə çıxarılmasını şərt qoyur. Müzakirə masasında zənginləşdirmə həddi, 440 kiloqramlıq uran ehtiyatının taleyi və sanksiyaların ləğvi üzrə yoxlama mexanizmlərinin yaradılması kimi kritik mövzular yer alır.