Bakı, AzerVoice, Nailə Babazadə
Ukrayna Prezidenti Volodimir Zelenski ABŞ Prezidenti Donald Trampla görüşündən sonra sülh planının bütün aspektlərinin müzakirə edildiyini bildirərək, “(Sülh planının) bunun 90 faizi üzrə razılıq əldə olunub,” dedi.
AzerVoice xəbər verir ki, Zelenski Trampla Florida ştatındakı Mar-a-Laqo malikanəsində keçirilən görüşdən sonra birgə mətbuat konfransında açıqlamalarla çıxış edib.
Bütün mövzularda səmərəli görüş keçirdiklərini bildirən Zelenski, ABŞ və Ukrayna komandaları arasında əldə olunan irəliləyişdən məmnunluğunu ifadə edib.
"20 maddədən ibarət sülh planımız var və bunun 90 faizi üzrə razılaşma əldə olunub. ABŞ və Ukrayna arasında təhlükəsizlik təminatları 100 faiz qəbul edilib. ABŞ, Avropa və Ukraynanın təhlükəsizlik təminatları isə demək olar ki, tam razılaşdırılıb. Hərbi ölçü 100 faiz qəbul olunub. Rifah planı isə son mərhələyə gətirilib." - deyə Zelenski qeyd edib.
Daimi sülhün təmin olunmasında təhlükəsizlik təminatlarının “açar məqam” olduğunu vurğulayan Zelenski, Avropa liderləri ilə aparılan telefon danışıqlarının “səmərəli” keçdiyini bildirib.
“Yaxın həftələrdə komandalarımızın müzakirə olunan bütün mövzuları yekunlaşdırmaq üçün bir araya gəlməsi barədə razılığa gəldik. Bundan əlavə, yanvar ayında, ehtimal ki, Vaşinqtonda Avropa liderlərinin və Ukrayna nümayəndə heyətinin iştirakı ilə Prezident Trampın ev sahibliyi edəcəyi bir görüşün keçirilməsi barədə də razılıq əldə etdik.” - deyə o vurğulayıb.
Ukraynanın sülhə hazır olduğunu bildirən Zelenski, 20 maddəlik planda komandaların nəticəyə çox yaxınlaşmasını görməkdən məmnun olduğunu dedi.
Zelenski Ukrayna komandalarının işi davam etdirdiyini qeyd edərək, bu tempdə davam edərsə, yanvar ayında 6 sənəd üzrə qərara gələcəklərinə ümid etdiklərini bildirdi.
Mümkün referendumun keçirilməsi üçün çoxlu sayda ukraynalının Avropada olduğuna diqqət çəkən Zelenski, ilk növbədə zəruri infrastrukturun qurulmasının vacib olduğunu və bunun asan bir proses olmadığını vurğuladı.