BAKI,AzerVoice, Fərid Mikayılov

Rusiyaya qaçan Əsəd ailəsinin Rusiyanın elit təbəqəsinin yaşadığı Rublyovka bölgəsində məskunlaşdığı, lüks, lakin təcrid olunmuş həyat sürdüyü, Əsma Əsədin leykoz xəstəliyini yendiyi, Bəşşar Əsədin isə tibbi biliklərini yeniləmək üçün dərslər aldığı və rus dili öyrəndiyi iddia olunub.

AzerVoice xəbər verir ki, İngiltərənin The Guardian qəzeti Suriyanın devrilmiş lideri Bəşşar Əsəd və ailəsinin izinə düşüb.

Qəzetin məlumatına görə, Əsəd ailəsi Rusiyanın paytaxtı Moskvada, yüksək mühafizə olunan və əsasən rus elitasının yaşadığı Rublyovka rayonunda yaşayır və maddi baxımdan heç bir çətinlik çəkmir. Bildirilir ki, Ukraynanın sabiq prezidenti Viktor Yanukoviç də eyni ərazidə məskunlaşıb.

Məqalədə qeyd olunur ki, Əsəd ailəsi Qərbin sanksiyalarının tətbiq olunduğu 2011-ci ildə maliyyə vəsaitlərini Rusiyaya köçürüb. Bu səbəbdən onların hazırda ciddi maliyyə problemi yoxdur.

Əsas ixtisası göz həkimi olan Əsədin tibbi biliklərini yenidən aktivləşdirmək üçün dərslər aldığı və rus dilini öyrəndiyi bildirilir. The Guardian-a danışan Əsədə yaxın mənbənin sözlərinə görə, “O, rus dilini öyrənir və oftalmologiya sahəsində biliklərini təzələyir. Moskvanın varlı elit təbəqəsi onun potensial müştəriləri ola bilər.”

Məqalədə xatırladılır ki, Əsma Əsəd Suriya müharibəsindən əvvəl leykoz xəstəliyinin müalicəsi üçün ailəsi ilə birlikdə Moskvaya gedib. İddiaya görə, o, eksperimental müalicə alıb və xəstəliyi məğlub edib.

Qəzet yazır ki, Əsəd ailəsi hazırda demək olar ki, tamamilə izolyasiya olunmuş həyat yaşayır və keçmiş Suriya rejimindən çox az sayda şəxslə əlaqə saxlayır.