BAKI, AzerVoice, Nailə Babazadə
Efiopiyanın cənubunda yayılan “Marburq” virusu səbəbilə rəsmi olaraq epidemiya elan edilib. Afrika İttifaqının Xəstəliklərə Nəzarət Mərkəzi (CDC Africa) və Ümumdünya Səhiyyə Təşkilatının (ÜST) məlumatına görə, virus indiyə qədər ən azı 9 insanda təsdiqlənib.
AzerVoice xəbər verir ki, ÜST-nin baş direktoru Tedros Adhanom Qebreyyesus bildirib ki, virus Efiopiyanın Cənub Bölgəsində yayılıb və ölüm riski 90 faizə qədərdir. Xəstəliyə səbəb olan “Marburq” virusu Ebola ailəsindən olub, əsasən meyvə ilə qidalanan yarasalardan insanlara keçir.
Hazırda Efiopiyada fövqəladə tədbirlər görülür, virusun sərhədlərdən kənara yayılmasının qarşısını almaq üçün beynəlxalq laboratoriyalara nümunələr göndərilib. ÜST ölkəyə mütəxəssislər və qoruyucu avadanlıqlar göndərdiyini təsdiqləyib.
Virusin yayılmasına Tanzaniya və Ruandada da rast gəlinib, hər iki ölkə 2024-cü ildə baş verən epidemiyalara nəzarət etdikdən sonra vəziyyətin stabilləşdiyini açıqlamışdı. Hazırda “Marburq” virusuna qarşı təsdiqlənmiş peyvənd və ya spesifik müalicə yoxdur, yalnız dəstəkləyici tibbi yardım sağ qalma şansını artırır.